باقىتجان ساعىنتايەۆ سۋ تاسقىنى مەن ورتكە قارسى شارا قابىلداماعان اكىمدەردى سوكتى
وتىرىس بارىسىندا ءبىرقاتار وبلىستىڭ اكىمى سۋ تاسقىنى مەن ءورت قاۋپىنىڭ الدىن الۋ باعىتىندا وڭىرلەردە اتقارىلىپ جاتقان جۇمىستار جايىندا ەسەپ بەرگەن بولاتىن. الايدا ولاردىڭ بايانداماسى ۇكىمەت باسشىسىنىڭ كوڭىلىنەن شىققان جوق.
«قازىرگى ۋاقىتتا قانداي ماسەلەلەردى شەشۋىمىز كەرەك؟ «باياعى جارتاس، سول جارتاس» دەگەن ءسوز بار. سۋ تاسقىنى كەلەدى، ۇيلەر سۋدىڭ استىندا قالادى، قىس كەلەدى، ۇيلەر ورتەنىپ جاتادى. ال ءبارىمىزدىڭ باياندامامىز كەرەمەت. مينيسترلەر قانداي كەمشىلىكتەردىڭ بار ەكەندىگىن ايتتى، سول تۋرالى جاۋاپ بەرۋ كەرەك. نە سەبەپتەن قارجىلاندىرۋ ماسەلەسى شەشىلمەدى؟ نەگە بەرىلمەدى، نەگە ىسكە قوسىلمادى؟ ورتكە نە سەبەپتى جول بەرىلدى؟ قانداي تەكسەرىس جۇرگىزىلىپ، نەدەي شارالار قابىلداندى؟ ول تۋرالى ءبىر اۋىز ءسوز جوق. ايتاتىندارىڭىز «ءبارى كەرەمەت، ءبارى جاقسى، قاتاڭ باقىلاۋدا». قانداي باقىلاۋدا ەكەندىگىن كورىپ وتىرمىز»، - دەدى باقىتجان ساعىنتايەۆ.
ايتا كەتەرلىگى، بۇل ماسەلە بويىنشا ۇكىمەت وتىرىسىندا ق ر ىشكى ىستەر ءمينيسترى قالمۇحانبەت قاسىموۆ، يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك بايانداما جاساعان بولاتىن.