قانداستارىمىزعا ارناپ «وتانداستار» قورى ءبىرىڭعاي كونتاكت-ورتالىعىن اشپاق

استانا. قازاقپارات - تاياۋ كۇندەرى ەلگە ورالعان جانە شەتەلدە تۇراتىن قانداستارىمىزعا ارنالعان ءبىرىڭعاي كونتاكت-ورتالىق ىسكە قوسىلادى، دەپ حابارلايدى قازاقپارات «وتانداستار» قورىنا سىلتەمە جاساپ.

«ورتالىق ماماندارى قانداستارىمىزدىڭ مازالايتىن ماسەلەلەردىڭ جاۋابىن تابۋعا كومەكتەسەتىن بولادى. وسىعان وراي قوردىڭ ءبىرىنشى ۆيتسە-پرەزيدەنتى تالعات ادۋوۆ پەن ۆيتسە-پرەزيدەنتى ءمادي ماناتبەك بايلانىس ورتالىقتارىن ۇيىمداستىرۋ قىزمەتىن كورسەتەتىن كومپانيانىڭ جۇمىسىمەن تانىسىپ قايتتى. كومپانيانىڭ تۇتىنۋشىلارى اراسىندا مەملەكەتتىك مەكەمەلەرمەن قاتار، جەكە ۇيىمدار دا بار. سولاردىڭ اراسىنان ەلوردادا ورنالاسقان بايلانىس ورتالىقتارىنىڭ جۇمىسىن قور باسشىلىعىنا ۇلگى رەتىندە كورسەتىپ ءوتتى»، دەلىنگەن قوردىڭ ينستاگرامداعى پاراقشاسىندا.

ايتا كەتەيىك، اتالمىش جوبا قوردىڭ سەرىكتەسى «قازاق تەلەكوم» ا ق- مەن بىرلەسىپ جۇزەگە اساتىن بولادى.