جەتىسۋ ءوڭىرىنىڭ ەڭ كورىكتى جەتى مەكەنى

نۇر-سۇلتان. قازاقپارات -ءتورت مەزگىلدىڭ تورەسى جاز مەزگىلىنە دە جاقىن قالدى. كۇن جىلىنىپ، تابيعات جاڭارعان شاقتا ادام اعزاسى تازا اۋاداعى دەمالىستى قالايدى.

ەڭبەك دەمالىسىن يا كەزەكتى ساياحاتتى شەتەلدەردە وتكىزۋدى قالتاسى كوتەرمەيتىن جاندار الىسقا بارماي- اق، دەمالىس كۇندەرىن الماتى قالاسى مەن وبلىسىنىڭ ەڭ كورىكتى مەكەندەرىندە وتكىزە الادى. نازارالارىڭىزعا جەر ءجانناتى جەتىسۋ ءوڭىرىنىڭ جەتى مەكەنىن ۇسىنامىز.

تۇيىق سۋ شاتقالى

شىمبۇلاق تاۋ شاڭعى شيپاجايىنان بيىك، تەڭىز دەڭگەيىنەن 2650 مەتر بيىكتىكتە ورنالاسقان. جانى جاياۋ ءجۇرۋدى جاقسى كورەتىن جاندار تاۋداعى مۇزدىققا كوتەرىلىپ، كۇنگە قاراي ۇمتىلسا بولادى. تۇيىق سۋدا جايلى قوناقۇيلەر مەن دەمالىس ۇيلەرى بار.

ۇلكەن الماتى كولى

تەڭىز دەڭگەيىنەن 2500 مەتر بيىكتىكتە ورنالاسقان. الماتى قالاسىنان كولىكپەن 1,5 ساعاتتا، جاياۋ 3 ساعاتتا جەتۋگە بولادى. بۇل جاقتا عاشىق جاندار كوپ شوعىرلاناتىن كوسموستانتسيا بار. عاشىق جاندار وبسەرۆاتوريادا قونىپ، ايلى تۇندە جۇلدىز ساناپ، تاڭ اتقىزادى.

يپپودروم

الماتى قالاسىندا بىرنەشە يپپودروم بار. يپپودروم قىزمەتكەرلەرى اتقا سالت ءمىنىپ جۇرۋدەن ءدارىس بەرە الادى. سونداي- اق، بۇل جاقتا ات جارىستارىن باقىلاۋعا بولادى. اتتاردى جالعا الىپ، دەمالىستى جايلى ءارى پايدالى ەتىپ وتكىزۋگە بولادى.

ىلە وزەنى

جەر ءجانناتى جەتىسۋ ءوڭىرىنىڭ ەڭ ادەمى مەكەندەرىنىڭ ءبىرى - ىلە وزەنىنىڭ جاعالاۋى. اسپان استىنداعى كونە مۇراجاي بولىپ سانالاتىن تامعالى تاس شاتقالىندا بالىق اۋلاپ، قايىقپەن ءجۇزىپ، تازا اۋامەن تىنىستاي الاسىز. «كوشپەندىلەر» ، «مىڭ بالا» سياقتى تاريحي فيلمدەردىڭ ءتۇسىرىلىم جۇمىستارى ىلە جاعالاۋىندا وتكەن. كينودا پايدالانعان ماكەتتەر ءالى كۇنگە دەيىن ساقتاۋلى.

شارىن شاتقالى

الماتى قالاسىنان 4 ساعاتتا جەتۋگە بولاتىن شاتقالدىڭ تابيعاتى كىم- كىمدى بولسا دا، وزىنە باۋراپ الادى. كەيبىر دەرەكتەرگە سۇيەنسەك، مۇنداي شاتقالدار الەم بويىنشا ءۇش ەلدە بار: امەريكاداعى كولورادو، تاجىكستان قۇزى جانە الماتى وبلىسىنداعى شارىن شاتقالى. شاتقالعا جىلدىڭ كەز كەلگەن ماۋسىمىندا بارۋعا بولادى. تەك جاز مەزگىلىندە اۋا- رايى وتە ىستىق بولادى. سوندىقتان دا، شاتقالعا ءساۋىر، مامىر جانە قىركۇيەك ايلارىندا بارعان ءجون.

تۇرگەن شاتقالى

شاتقال سارقىرامالارىمەن وتە تانىمال. ستراۋس قۇستارىن وسىرەتىن فەرما مەن فورەل شارۋاشىلىعى بار. سارقىراماعا جاياۋ كوتەرىلۋگە بولادى. ال جاياۋ جۇرگەندى ۇناتپايتىن جاندار سارقىراماعا كوتەرىلۋ ءۇشىن اتتى جالعا السا بولادى. اتتاردى جالعا الۋ 400-500 تەڭگەنى قۇرايدى.

كولساي

قازاقستاننىڭ ەڭ كورىكتى مەكەندەرىنىڭ قاتارىنداعى كولساي تاۋىندا ءۇش كول بار. تابيعاتى اسەم، اۋاسى شيپا، سۋى ءدارۋ جەرگە وزگە ەلدەردەن تۋريستەر كوپ اعىلادى. كولساي تاۋلارىنىڭ ەتەگىندە كيىز ۇيلەر تىگىلگەن. كول ايدىنىندا قايىقپەن ءجۇزىپ، تارتىمدى تابيعات اياسىندا دەمالۋعا بولادى.

Massaget.kz