الماتى ورتالىعىندا بايلاۋلى تۇرعان ايۋدىڭ يەسى انىقتالدى

 الماتى. قازاقپارات - الماتى ورتالىعىندا بايلاۋلى تۇرعان ايۋدىڭ يەسى انىقتالدى دەپ حابارلايدى قازاقپارات ءتىلشىسى.

جابايى جانۋارعا قاتىستى ۆيدەو ينستاگرامداعى پابليكتەردىڭ بىرىندە جاريالانعان بولاتىن. عيماراتتىڭ جانىندا بايلاۋلى تۇرعان جانۋاردىڭ اۋزىندا تۇمىلدىرىق بار ەكەنى كورىنەدى. كادر سىرتىنداعى داۋىس ايۋدىڭ الماتىنىڭ ورتالىعىندا جۇرگەنىن ايتادى.

بەلگىلى بولعانداي، بۇل رەسەيدەن كەلگەن سيرك اكتەرى افاناسي ەكەن. الماتىعا رەسەيدەن مستيسلاۆ زاپاشنىي اتىنداعى سيرك گاسترولدىك ساپارمەن كەلگەن.

افاناسي ەسىمدى ايۋدى سيرك ۇيرەتۋشىسى سىرتتا سەرۋەندەتىپ جۇرگەن.

«جانۋارلاردى ۇيرەتۋشى قونجىقتى سيرك اينالاسىندا سەرۋەندەتىپ جۇرگەن. ءبىراق ۆيدەودا ول كورىنبەيدى. تەرريتوريا جابىق ءارى ايۋدىڭ تۇمسىعىندا تۇمىلدىرىق بولدى. سوندىقتان، ادامدار ءۇشىن قاۋىپ توندىرمەيدى. الەۋمەتتىك جەلىدە ايۋ نەگە سونشا ارىق دەگەن كوممەنتاريلەر دە بولدى»، - دەدى سيرك اكىمشىسى سەرگەي بەلينسكي.

ونىڭ ايتۋىنشا، سيرك قىزمەتكەرلەرى 3 قونجىقتى ءۇش ايلىق كەزدەرىندە قۇتقارىپ قالعان.

«ءبىزدىڭ قىزمەتكەرلەر ونى 6-7 اي ەمدەدى. ۆەتەرينارعا اپاردى. دارىگەرلەردىڭ ايتۋىنشا، ولاردىڭ كۇيزەلىس پەن اشتىقتىڭ كەسىرىنەن اعزالارىنىڭ دامۋى كەشەۋىلدەپ قالعان. سول سەبەپتى جانۋارلار بويى وسپەي قالعان. قازىر ولار ءبىزدىڭ سيركتىڭ ارتىستەرى! ايۋلار تابيعاتىندا قىستا سەمىز، كوكتەمگە قاراي ارىق شىعادى»، - دەدى ول.

 الماتىعا افاناسيدەن بولەك، تاعى ەكى قونجىق، يتتەر، جىلقىلار، اق جانە ۋسسۋري جولبارىستارى اكەلىندى.

ايتا كەتۋ كەرەك، 8 -اقپاندا تۇركىستان وبلىسى، سايرام اۋدانىندا جەرگىلىكتى تۇرعىندار كادىمگى ايۋدى مال بازاردا ساتپاق بولعان. قارابۇلاق بازارىنان تابىلعان ايۋدى ولار تەمىر توردا قاماپ ۇستاعان. وبلىستىق پوليتسيا دەپارتامەنتى بۇل دەرەكتى قىلمىستىق كودەكستىڭ 339-بابىنا سايكەس سوتقا دەيىنگى تەرگەۋ ءىسى رەەسترىنە تىركەدى. ال جابايى ايۋ شىمكەنتتەگى زووباققا تاپسىرىلدى. قازىر ونىڭ كۇتىمىمەن باق قىزمەتكەرلەرى اينالىسۋدا.