سالىق تولەنبەيتىن مەملەكەتتەر

نۇر-سۇلتان. قازاقپارات - ەگەر ءسىز قازاقستاندا تۇرساڭىز جانە بارلىق جەردە سالىق تولەپ، بارلىق جەردە جۇرتشىلىق ول تۋرالى زارلاپ جۇرەدى دەپ ويلاساڭىز، قاتەلەسەسىز.

وزگەشە جۇيەلەر قۇرعان مەملەكەتتەر دە بار، ول جۇيەلەر سالىق تولەنۋىن تالاپ ەتپەيدى. بۇل قاي ەلدەر ەكەنىن ايتىپ شىعايىق. ونداعى حالايىق ج ت س (جەكە تۇلعالاردىڭ تابىس سالىعى) دەگەننىڭ نە ەكەنىن دە بىلمەيدى، ءبىرازىندا ق ق س (قوسىمشا قۇن سالىعى) دا جوق.

كايمان ارالدارى

كايمان ارالدارىنان باستايىق. بۇل جەردە تابىس پەن پايدا سالىعى دەگەن جوق، بۇل جەردە مىندەتتى ساقتاندىرۋ جارنالارى، ق ق س دەگەندەر ەشكىمنىڭ قاپەرىنە كىرىپ شىقپايدى. ءومىر ەمەس، ەرتەگى دەرسىڭ. مەملەكەتتەر ايتەۋىر عايىپتان تايىپ قىزمەتىن اتقارىپ وتىر، ونداعى جۇيە حالقىن توناۋدى كوزدەمەيدى. كايمان ارالادارى تۇرعىندارىنىڭ تولەيتىن بىردەن ءبىر نارسەسى - يمپورتالعان تاۋارلار ءۇشىن %25 بولاتىن باج سالىعى رەتىندە تولەيتىن اقىسى عانا.

اراب امىرلىكتەرى

اراب امىرلىكتەرى جايىندا ءسىز، البەتتە، بىلەسىز. بۇل بايلىعى تاسىعان مەملەكەت تۋراسىندا وتە كوپ ايتىلعان. ول ەل جىلما جىل ميلليونداپ، ونىڭ ىشىندە قازاقستاننان دا، تۋريستەر تارتىپ وتىر. ءباا حالقى دا سالىق تۋرالى ەشتەڭە بىلمەيدى، ال بۇل ەل بولسا حالىق سانىنا شاققاندا تابىسى الەمدەگى ەڭ جوعارى ەلدەردىڭ ءبىرى. ارابتارداعى سالىقتىڭ جالعىز ءتۇرى - الكوگول ونىمدەرىنە سالىناتىن 50 پايىزدىق سالىق جانە 2018 دەن باستاپ 5 پايىزدىق ققس (قوسىمشا قۇن سالىعى) دا ەنگىزىلدى.

قاتار

قاتار - الەمدەگى ەڭ باي ەل دەپ ەش تايسالماي ايتۋعا بولادى. بۇل ەل ءوزىنىڭ ينفراقۇرىلىمىن جاساپ شىعۋدا قىرۋار جۇمىس اتقاردى. جارنالار مەن سالىقتاردىڭ تولەنەتىن ءبىردى- ەكىلى ءتۇرى - الەۋمەتتىك ساقتاندىرۋ مەن يمپورتتىق تاۋارلاردان الىناتىن 5 پروتسەنتتىك سالىق. ەلدىڭ مول تابيعي رەسۋرستارى ازداي، ەشكىم حالىقتان جەر بايلىعى ءۇشىن اقشا المايدى. 2019 دان باستاپ 5 پايىزدىق ق ق س (قوسىمشا قۇن سالىعى) ەنگىزىلۋى مۇمكىن.

ومان سۇلتاندىعى

تاياۋ شىعىستاعى بۇل مەملەكەت ءباا سياقتى جۇرت كوڭىلىنەن شىعىپ وتىر. اڭگىمە ومان سۇلتاندىعى جايىندا. بۇل ەل نەگىزىنەن ءوزىنىڭ مۇنايى ارقاسىندا تىرشىلىگىن جاساپ وتىر. وندا تابىس سالىعى، پايدا سالىعى دەگەن بولمايدى، تولەنەتىن جالعىز سالىق - الەۋمەتتىك ساقتاندىرۋ عانا، ونىڭ مولشەرى الاتىن جالاقىنىڭ %6,5 قۇرايدى. سالىق سالىناتىن بىردەن ءبىر نارسە - جىلجىمايتىن مۇلىكتى ساتىپ الۋ- ساتۋ.

كۋۆەيت

كۋۆەيت - بۇل مۇنايدى ەكسپورتتاۋدان الەمدە التىنشى ورىندا تۇرعان مەملەكەت، ناق وسى مۇنايدان تۇسەتىن تابىستار ەلدىڭ بيۋدجەتىنىڭ %95 قۇرايدى. جالپى العاندا، كۋۆەيت دۇنيە جۇزىندەگى ەڭ باي مەملەكەتتەردىڭ ءبىرى بولىپ وتىر، بۇنى حالىق باسىنا شاققانداعى تابىستىڭ جوعارى دەڭگەيىنەن كورەمىز. كۋۆەيت تۇرعىندارىنىڭ تولەيتىنى - الەۋمەتتىك ساقتاندىرۋعا تولەيتىن جارنالار عانا.

باحرەين

ازاماتتارىنان سالىق جينامايتىن مەملەكەتتەر تىزىمىنە كىرەتىن ەلدەردى باعىپ وتىرعان نارسە - مۇناي ساتۋ. مىسالى، باحرەيندە ءابۋ-سافا دەگەن مۇناي شىعاتىن جەر بار. سول جەردەن شىعاتىن مۇناي عانا حالىقتى ءناپاقاسىن ايىرىپ وتىر. باحرەين تۇرعىندارى دا تەك الەۋمەتتىك جارنالاردى تولەيدى، ال شەتەلدىكتەر پارسى شىعاناعىنداعى جىلجىمايتىن مۇلىكتى جالعا العانى ءۇشىن سالىق تولەۋگە مىندەتتى. 2018 دەن باستاپ 5 پايىزدىق ق ق س (قوسىمشا قۇن سالىعى) ەنگىزىلدى.

بەرمۋد ارالدارى

بۇل تىزىمدەگى تاعى ءبىر ءمارت ەلدەردىڭ ءبىرى - بەرمۋد ارالدارى. ۇلى بريتانيانىڭ مۇحيتتىڭ ارعى جاعىنداعى اۋماقتارىنىڭ ءبىرى الەمدەگى نە ىشەمىن، نە جەيمىن دەپ باس قاتىرمايتىن ەلدەردىڭ ءبىرى. ەل ازاماتتارىنىڭ 20 پايىزعا جۋىعى ودان تىس جەرلەردە دۇنيەگە كەلگەن. ولار نە ءۇشىن بۇل ارالدارعا اۋەس ەكەنى تۇسىنىكتى شىعار؟ بۇل ازاماتتار دا الەۋمەتتىك قامسىزداندىرۋ جارناسىن عانا تولەيدى. جىلجىمايتىن مۇلىك پەن مۇراگەرلىك ءۇشىن سالىناتىن ازداعان سالىق بار.

باگام ارالدارى

باگام ارالدارى تۋرالى ايتپاي كەتسەك بولماس. ەشقانداي تابىس سالىعى مەن پايدا سالىعى اتىمەن جوق، ەلدەگى بارلىق جۇمىسكەرلەر الەۋمەتتىك ساقتاندىرۋ جارنالارىن تولەيدى. ال ەلدىڭ بيۋدجەتىنىڭ شامامەن 70 پروتسەنتىن يمپورتقا سالىناتىن كەدەندىك باج سالىعى قۇرايدى. ەلدىڭ تۇرعىندارى تەك جىلجىمايتىن مۇلىك ءۇشىن عانا سالىق تولەيدى.

موناكو كنيازدىگى

تاعى ءبىر نازاردان تىس قالماۋى كەرەك ەل - موناكو كنيازدىگى. ول جەردە تابىس سالىعىن 19 -عاسىردىڭ وزىندە جوق قىلعان. وندا تەك فرانسيا ازاماتتارى سالىق تولەيدى، بۇنداي مىندەت ولاردىڭ موينىنا 1957 -جىلى ارتىلدى. اندوررا جايىندا دا ءدال وسىنى ايتۋعا بولادى. بۇل قۇيتىمداي مەملەكەت تۋريزمنىڭ ارقاسىندا ءناپاقاسىن تاۋىپ وتىر، ول ەلدە جىلىنا شامامەن 9 ميلليون تۋريست بولىپ قايتادى. بۇل بولسا، ەلدىڭ بۇكىل ءى ج ءو 80 پروتسەنتىن قۇرايدى.