تۇركىستاندا كاسىپكەر ەكى وتباسىعا ءۇي الىپ بەردى

 استانا. قازاقپارات - بۇگىندە قوعامدا قايىرىمدىلىق جاساپ، ەلگە قول ۇشىن سوزاتىن ازاماتتار كوبەيىپ كەلەدى.

سولاردىڭ ءبىرى - تۇركىستان وبلىسى، قازىعۇرت اۋدانىنىڭ كاسىپكەرى سىرىم ەرتايەۆ. «قايىپ اتا» ج ش س باسشىسى، «قازاقستانداعى 100 جاڭا ەسىم» جوباسىنا ەنگەن ازامات ءوز قارجىسى ەسەبىنەن كوپبالالى 2 وتباسىعا باسپانا سالىپ بەردى.

 جومارت جۇرەكتى كاسىپكەرگە العىسىن بىلدىرگەن ەكى وتباسى بۇگىندە جاڭا باسپانالارىندا باقىتتى عۇمىر كەشىپ جاتىر. قازاقستاندا ەت ەكسپورتىنىڭ الەۋەتىن كوتەرىپ، شەتەلگە ەت تاسىمالداپ جۇرگەن سىرىم ەرتايەۆ ءوز كاسىبى ارقىلى كوپتەگەن تۇرعىنداردى جۇمىسپەن قامتىپ وتىر. وسىلايشا، ول «قازاقستانداعى 100 جاڭا ەسىم» قاتارىنا شىنايى ەل پاتريوتى رەتىندە ەنگەنىن ىسىمەن دالەلدەدى. الداعى ۋاقىتتا دا قايىرىمدىلىق شارالارىنا اتسالىسۋدى كوزدەپ وتىرعان كاسىپكەرگە ەل ءدان ريزا.

 قازىرگى تاڭدا قازىعۇرت اۋدانىندا قايىرىمدىلىق جاساۋدان جارىس ءوتىپ جاتىر دەۋگە بولاتىنداي. ماسەلەن، جۋىردا عانا ەلىمىزدەگى 11 ميلليونىنشى قازاقتىڭ وتباسىنا اۋدان اكىمدىگى جاڭا پاتەردىڭ كىلتىن تاپسىردى. مۇحتار ءابدىراحىم قازىعۇرت اۋدانى قاراباۋ اۋىلدىق وكرۋگى ءۇشبۇلاق اۋىلىندا دۇنيەگە كەلگەن. ول قازاقستاندا تۋعان 11 ميلليونىنشى قازاق بولىپ تىركەلگەن. مۇحتاردىڭ اكەسى مالىك بادامبايەۆ اۋىل شارۋاشىلىعىمەن اينالىسادى. اناسى شولپان كۇدەربەكوۆا -  مەكتەپتە ءمۇعالىم. ءۇيلى بولعان وتباسى ەل ازاماتتارىنا العىستارىن ايتتى.

كۇنى كەشە عانا قازىعۇرت اۋىل وكرۋگىنىڭ تۇرمىسى تومەن 30 وتباسىنا دەپۋتاتتاردىڭ دەمەۋشىلىگىمەن ازىق- تۇلىك بەرىلىپ، كومەك كورسەتىلدى. وتباسىلارعا وبلىستىق ءماسليحات دەپۋتاتى ن. اشيروۆ جانە اۋداندىق ءماسليحات دەپۋتاتتارى دەمەۋشىلىك تانىتتى. ال، اۋداندىق "جالىندا جاستار" قوعامدىق بىرلەستىگى وبلىس جانە اۋدان كاسىپكەرلەرىنىڭ قولداۋىمەن الەۋمەتتىك جاعدايى از قامتاماسىز ەتىلگەن وتباسىلارعا ءۇي- جيھازدارىن جانە ازىق- تۇلىك الىپ بەرگەن. قايىرىمدىلىق ءىس- شارالارى الداعى ۋاقىتتا دا جالعاسىن تاپپاق.