15:47, 11 - اقپان 2019 | GMT +6
اۋەجايدا جالعان قۇجات كورسەتكەن جولاۋشىلار شەكارا اسا الماي قالدى
الماتى. قازاقپارات - الماتى اۋەجايىندا جالعان قۇجاتپەن مەملەكەتتىك شەكارادان وتپەك بولعان جولاۋشىلار ۇستالدى، دەپ حابارلايدى قازاقپارات ءتىلشىسى الماتى حالىقارالىق اۋەجايىنىڭ فەيسبۋكتەگى پاراقشاسىنا سىلتەمە جاساپ.
«10 - اقپاندا «ىستانبۇل- الماتى» ر س-100 رەيسىنىڭ جولاۋشىلارىن تىركەۋ كەزىندە تۇركيا ازاماتى تۋعان اعاسىنىڭ قۇجاتىمەن ءوتىپ كەتپەك بولعان. ول ءوز ەلىندە وتاندىق بورىشىن وتەۋدەن قاشقان. سول سەبەپتى وعان ءوزىنىڭ قۇجاتىمەن شىعۋىنا تىيىم سالىنعان» ، - دەدى شەكارا قىزمەتىنەن.
ودان بولەك يراك ازاماتى مەن اۋعانستان ازاماتى شەكارانى جالعان قۇجاتپەن بۇزباق بولعان. يراك ازاماتى ءوزىن فرانسيانىڭ ازاماتى رەتىندە تىركەمەك بولعان.
قۇقىق بۇزۋشى ازاماتتار الماتىدان ەۋروپاعا ءوتىپ كەتكىسى كەلگەن. بۇل دەرەكتەر بويىنشا تەكسەرۋ ءجۇرىپ جاتىر.