ولجاس سۇلەيمەنوۆ ۆولەيبولدان حالىقارالىق تۋرنيردە ۇزدىك ويىنشى اتاندى

اتىراۋ. قازاقپارات - اتىراۋ قالاسىندا دىنمۇحامەد احمەت ۇلى قونايەۆتى ەسكە الۋعا ارنالعان ۆولەيبولدان ارداگەرلەر اراسىندا حالىقارالىق تۋرنير مارەسىنە جەتتى، دەپ حابارلايدى قازاقپارات ءتىلشىسى.

وبلىستىق سپورت باسقارماسىنىڭ باسپا ءسوز حاتشىسى ءىلياس شايحيەۆتىڭ ايتۋىنشا، ءۇش كۇن بويى وزبەكستان استاناسى تاشكەنت قالاسىنىڭ، ەلىمىزدىڭ شىعىس قازاقستان، جامبىل وبلىستارى مەن الماتى، شىمكەنت، اقتاۋ، استانا جانە اتىراۋ قالالارىنىڭ مىقتىلارى جۇلدەلەردى ءوزارا ساراپقا سالدى.

جارىس جەڭىمپازى بولىپ الماتى قالاسىنىڭ «كازناۋ بۋريەۆەستنيك» قۇراما كومانداسى تانىلدى. قازاقستاننىڭ ەڭبەك ەرى، اقىن، جازۋشى ولجاس سۇلەيمەنوۆ باستاعان كوماندا بارلىق قارسىلاستارىن ايقىن باسىمدىلىقپەن ۇتتى.

ەكىنشى ورىندى اقتاۋ قالاسىنىڭ «ماڭعىستاۋ» كومانداسى ەنشىلەسە، ۇزدىك ۇشتىكتى تاراز قالاسىنىڭ «ارداگەر» كومانداسى قورىتىندىلادى.

جارىستىڭ ۇزدىك ويىنشىسى بولىپ ولجاس ومار ۇلى تانىلدى. 83 جاستاعى ارداگەرگە ءداستۇر بويىنشا «ات» مىنگىزىلدى. وسىمەن ونىنشى مارتە ۇيىمداستىرىلعان تۋرنيرگە جارىس قوناقتارى جوعارى باعاسىن بەردى.

جارىستىڭ اشىلۋ سالتاناتىندا حالىق جازۋشىسى 90 جاسقا كەلگەنشە ۆولەيبول ويناعىسى كەلەتىنىن ايتىپ ءوتتى.

«باتىرلار ەلىنە كەلگەندە بارلىق ماراپاتىمدى ىسىرىپ قويىپ، وسى ءبىر توسبەلگىنى تاعۋدى ۇيعاردىم. سەبەبى بۇل ماعان دەگەن كۇللى باتىس ءوڭىرىنىڭ جاساعان قۇرمەتى»، - دەيدى ولجاس ومار ۇلى.