قازاقستاندىق بوكسشىلار حالىقارالىق تۋرنيردە ءۇش التىن الدى

استانا. قازاقپارات - ماجارستاننىڭ دەبرەتسەن قالاسىندا بوكستان يشتۆان بوچكايدى ەسكە الۋعا ارنالعان حالىقارالىق تۋرنير مارەسىنە جەتتى.

اتالمىش تۋرنيردە قازاقستاندىق ءۇش بىلعارى قولعاپ شەبەرى چەمپيون اتاندى، دەپ حابارلايدى قازاقپارات ءتىلشىسى قازاقستان بوكس فەدەراتسياسىنا سىلتەمە جاساپ.

حالىقارالىق تۋرنيردە ساكەن بيبوسىنوۆ (52 كەلى)، سەرىك تەمىرجانوۆ (60 كەلى) جانە قۇلاحمەت تۇرسىنباي (75 كەلى) التىننان القا تاقتى.

ساكەن بيبوسىنوۆ اقتىق سايىستا ۋكراين يگور سولينسكيمەن قولعاپ ءتۇيىستىردى. تورەشىلەر شەشىمىمەن جەڭىس ءبىزدىڭ بوكسشىعا بۇيىردى.

ال سەرىك تەمىرجانوۆ فينالدا تايلاندتان كەلگەن دجۋنترونگ رۋدجاۋكرانمەن شەبەرلىك بايقاسقان ەدى. بۇل كەزدەسۋدە ءبىزدىڭ بىلعارى قولعاپ شەبەرىنىڭ باسىمدىعى ايقىن اڭعارىلدى.

75 كەلىدە سىنعا تۇسكەن قۇلاحمەت تۇرسىنباي شارشى الاڭدا شيراق قيمىلداي ءبىلدى. تورەشىلەردىڭ ءبىراۋىزدان شەشىمىمەن ول پولياك بوكسشىسى بارتوش گولەبيۆسكيدى جەڭدى.

اقتىق سايىسقا شىققان تاعى ءبىر جەرلەسىمىز ورازبەك اسىلقۇلوۆ سوڭعى ساتتە سىر بەرىپ قويدى. ول سامۋەل كيستوحارريگە جەڭىلىپ قالدى. ال جارتىلاي فينالدا ۋكراينالىق قارسىلاسى الەكساندر مەلەنيۋككە ەسە جىبەرگەن سابىرجان بەكبەرگەنوۆ قولا جۇلدەگە قول سوزدى.

اتالمىش جارىستا سەرىك تەمىرجانوۆ تۋرنيردىڭ ۇزدىك ويىنشىسى اتاندى.

جالپى كوماندالىق ەسەپتە قازاقستان ەكىنشى ورىن الدى. ءبىرىنشى ورىنعا رەسەي، ءۇشىنشى ورىن ماجارستان قۇراماسى جايعاستى.