دزيۋدو: يسلام بوزبايەۆ پاريجدە كۇمىس جۇلدەگەر اتاندى
يسلام بوزبايەۆ 90 كەلىگە دەيىنگى سالماقتا تاماشا كۇرەسىپ، ءۇش قارسىلاسىن يپپون ادىسىمەن تازا جەڭدى.
قازاقستاندىق دزيۋدوشى جارتىلاي فينالدا يزرايل سپورتشىسى لي كوحماندى ۆازاري ۇپايىمەن ۇتتى.
يسلامنىڭ فينالداعى قارسىلاسى الەم چەمپيونى اتانۋمەن بىرگە ريو وليمپياداسىندا قولا جۇلدە العان كۆاك دون حان وتە مىقتى ەدى. بۇعان دەيىن بالۋاندار ەكى مارتە كەزدەسىپ، ءبىر-بىردەن جەڭىسكە جەتكەن بولاتىن.
تارتىستى وتكەن بەلدەسۋ بارىسىندا وڭتۇستىككورەيالىق بالۋان ۆازاري تاسىلىمەن العا شىقتى. سودان كەيىن يپپون ادىسىمەن ۇتىپ كەتتى.
ءبىر ايتا كەتەتىن جايت، «Grand Slam» تۋرنيرىنىڭ جەڭىمپازى اتانعان سپورتشىعا 1 مىڭ ۇپاي بەرىلەدى. كۇمىس جۇلدەگەرگە - 700، ءۇشىنشى ورىن يەگەرىنىڭ ەنشىسىنە 500 ۇپاي تيەدى.
ەسكە سالا كەتەيىك، بۇدان بۇرىن قوس قازاقستاندىق دزيۋدوشىنىڭ وسى پاريج جارىسىندا جۇلدەگەر اتانعانىن جازعان بولاتىنبىز. بۇل - ارينە، قازاقستان ۇلتتىق قۇراماسى ءۇشىن جاقسى كورسەتكىش.