گۇلشارا ءابدىقالىقوۆا بىرىككەن اراب امىرلىكتەرىنىڭ مەملەكەت قايراتكەرلەرىمەن كەزدەستى

استانا. قازاقپارات - قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا بىرىككەن اراب امىرلىكتەرىنىڭ مەملەكەت قايراتكەرلەرىمەن، ازاماتتىق قوعام كوشباسشىلارىمەن كەزدەستى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

بىرىككەن اراب امىرلىكتەرىنە قازاقستاننىڭ كاسىپكەر ايەلدەرىنىڭ دەلەگاتسياسىن باستاپ بارعان گۇلشارا ءابدىقالىقوۆا وسى ەلدىڭ مەملەكەت قايراتكەرلەرىمەن، ازاماتتىق قوعام كوشباسشىلارىمەن ءبىرقاتار ەكى جاقتى كەزدەسۋلەر وتكىزدى.

مەملەكەتتىك حاتشى بىرىككەن اراب امىرلىكتەرى ايەلدەر باس كەڭەسىنىڭ ءتورايىمى شەيحا ءفاتيما بينت مۋباراكپەن كەزدەسۋدە ەكى ەل ايەلدەرىنىڭ بيزنەس-قوعامداستىعى ىنتىماقتاستىعىنىڭ باسىمدىقتارىن، مەملەكەتتىك وتباسىلىق ساياساتتى، انا مەن بالانى قورعاۋ، ايەلدەردىڭ قۇقىقتارى مەن مۇمكىندىكتەرىن كەڭەيتۋ ماسەلەلەرىن قاراستىردى.

گ. ءابدىقالىقوۆا ساۋدا-ونەركاسىپ پالاتالارى فەدەراتسياسىنىڭ ءتوراعاسى مۇحاممەد تاني ار-رۋمەيسيمەن جۇزدەسىپ، تاراپتار ەلدەرىمىزدىڭ ساۋدا-ەكونوميكالىق جانە ينۆەستيتسيالىق بايلانىستارىنىڭ دەڭگەيىن ودان ءارى ارتتىرۋ، ازىق-تۇلىك قاۋىپسىزدىگىن قامتاماسىز ەتۋ ماسەلەلەرىن تالقىلادى.

مەملەكەتتىك حاتشى قازاقستان-امىرلىكتەر بيزنەس-سامميتى بارىسىندا قول قويىلعان «اتامەكەن» ۇ ك پ ىسكەر ايەلدەر كەڭەسى مەن ب ا ءا ىسكەر ايەلدەر كەڭەسى اراسىنداعى ىنتىماقتاستىق تۋرالى مەموراندۋمدا ەكىجاقتى ىسكەرلىك بايلانىستى ءارتاراپتاندىرۋ، بيزنەس-ميسسيالار الماسۋ، ءتۇرلى ىسكەرلىك ءىس-شارالارعا قاتىسۋ جونىندەگى بىرلەسكەن ناقتى قادامدار قاراستىرىلعانىن اتاپ ءوتتى.

جۇمىس ساپارىنىڭ سوڭىندا مەملەكەتتىك حاتشى گۇلشارا ءابدىقالىقوۆا UN Women وكىلدىگىنىڭ ديرەكتورى موزا ءاش-شەححيمەن جۇزدەستى.

كەزدەسۋدە ايەلدەردىڭ جاعدايىن جاقسارتۋ، ايەلدەر كاسىپكەرلىگىن دامىتۋ، گەندەرلىك تەڭدىكتى ىلگەرىلەتۋ ماسەلەلەرى تالقىلاندى. قازاقستان دەلەگاتسياسى سونداي-اق دۋبايدىڭ «اقىل-وي بىرلىگى ارقىلى - بولاشاقتى جاسايمىز» اتتى ەكسپو-2020 حالىقارالىق كورمەسىنە دايىندىعىمەن تانىستى.