توسبەلگىلەردەگى تاريح: استانادا فالەريستىك جادىگەرلەر كورمەسى اشىلدى
كورمەگە شىعىسقازاقستاندىق فالەريست قايىربەك رامازانوۆ جيناعان تاڭدامالى توسبەلگىلەر قويىلدى.
«بۇرىندارى ەكىنشى دۇنيەجۇزىلىك سوعىستان ورالعان اتالارىمىزدىڭ وردەن- مەدالدارىن اتا- انالارىمىز قاستەرلەپ، بالانىڭ قولى جەتپەيتىن جەردە ساقتايتىن. ۇلتتىق مۋزەي بۇل باعىتقا دا ۇلكەن كوڭىل ءبولىپ كەلەدى. الەمدە ءار وردەن- مەدال تاريحىنان كىتاپ جازىپ، تانىلعان تۇلعالار بار. قايىربەك رامازانوۆتىڭ دا جيناعان بۇيىمدارى حالقىمىزدىڭ تاريحىن تۇگەندەۋ تۇرعىسىندا قۇندى جادىگەرلەر بولىپ سانالادى. اسىرەسە جاس ۇرپاق ءۇشىن تاربيەلىك ماڭىزى زور كورمە بولادى دەپ ەسەپتەيمىن. ق. رامازانوۆ ءوزى جيناعان 12 مىڭ مەدالدىڭ ءارقايسىسىنا عىلىمي تۇرعىدا توقتالىپ، انىقتامالىق تۇجىرىم جاساعان. بار جادىگەرىن حالىقپەن ءبولىسىپ، مۋزەي قورىنا ۇسىنۋى دا اعامىزدىڭ وتانسۇيگىشتىگىنەن حابار بەرەدى» ، - دەدى كورمەنىڭ اشىلۋ سالتاناتىندا ق ر ۇلتتىق مۋزەيى ديرەكتورىنىڭ ورىنباسارى اباي ساتىبالدين.
بۇگىندە قايىربەك رامازانوۆتىڭ توپتاماسىندا 12 مىڭنان استام توسبەلگى، وردەن مەن مەدالدار بار. ونىڭ 10 مىڭعا جۋىعى ۇلتتىق مۋزەي قورىندا ساقتاۋلى.
«وتكەن عاسىردىڭ 1970 -جىلدارىنان باستاپ، قولىما تۇسكەن بارلىق توسبەلگىلەردى جيناپ كەلەمىن. جەكە قورىمدا كەڭەستىك زاماننان بۇگىنگە دەيىنگى ەڭبەك داڭقى وردەندەرى، عارىش، تەڭىز فلوتى، پەداگوگيكا، سپورت، اۋىل شارۋاشىلىعى بويىنشا وتاندىق جانە شەتەلدىك وردەن- مەدالدار بار. دۇنيەجۇزىنىڭ مونەتالارى مەن قاعاز اقشاسى بار. ءتىپتى ءجۇز مىڭ تەڭگەگە پوبەدا توسبەلگىسىن ساتىپ العانمىن. مۇنىڭ ءبارى - تۇنىپ تۇرعان تاريح» ، - دەيدى قايىربەك رامازانوۆ.
ونىڭ ايتۋىنشا، ك س ر و- دا فالەريستيكا 1950 -جىلدارى تانىمال بولدى. بۇل كەزدە مەملەكەتارالىق بايلانىستارمەن تۋريزمگە كوڭىل بولىنە باستاعان جانە ءتۇرلى ەستەلىك بۇيىمدار جاپپاي شىعارىلعان.
سپيكەر ءوز سوزىندە قازاقستان جاستارىن فالەريستيكامەن بەلسەندى اينالىسۋعا شاقىردى.
«كوپ ادامدار اتا- بابالارىنان قالعان ەستەلىك بەلگىلەردى قۇنتتامايدى، جوعالتادى، اياقاستى ەتەدى. كوللەكسيونەر رەتىندە ەلىمىزدەگى قانشاما توسبەلگىنىڭ ساقتالماعانىنا، جەر بەتىنەن جوعالعانىنا جانىم اشيدى. ەلەۋسىز بولىپ كورىنەتىن ەستەلىك بەلگىلەردى ەلۋ جىلدان بەرى جينادىم. قازاقتىڭ ۇل- قىزدارى، اسىرەسە جاستار، ۇيىڭىزدە جاتقان ءبىر تيىن، ءبىر مەدال بولسا دا، مۋزەيگە تاپسىرۋعا تىرىسىڭىزدار. مۇنىڭ ءبارى كەلەر ۇرپاققا مۇرا بولىپ قالادى. ءارقايسىسى - تاريحتان سىر شەرتەتىن قۇندى جادىگەر بولىپ سانالادى» ، - دەدى ول.
قايىربەك رامازانوۆ وسكەمەندەگى ماشينا جاساۋ زاۋىتىندا ينجەنەر بولىپ قىزمەت ەتكەن. قازىر زەينەتتە، استانا قالاسىندا تۇرادى جانە فالەريستىك كورمەلەر وتكىزەدى.
ايتا كەتەيىك، فالەريستيكا - مەدال، وردەن، توسبەلگى، مەرەيتويلىق، قۇرمەت جانە ۆەدومستۆولىق سىندى ءارتۇرلى توسكە تاعاتىن بەلگىلەردى جيناقتاۋ. بۇل اتاۋ ريم لەگيونەرلەرىنىڭ ماراپاتىن بىلدىرەتىن «فالەرا» سوزىنەن شىققان. اتالعان ۇعىمدى وتكەن عاسىردىڭ وتىزىنشى جىلدارى چەحوسلوۆاكيالىق عالىم ءارى كوللەكتسيونەر ولدجيح پيلتس العاش رەت قولدانىپ، عىلىمي قولدانىسقا ەنگىزگەن.
