قازاقستان ورتالىق ازيا ەلدەرىنە مۇناي ونىمدەرىن ەكسپورتتاۋدى باستايدى

 استانا. قازاقپارات - قازاقستان اعىمداعى جىلى ورتالىق ازيا ەلدەرىنە مۇناي ونىمدەرىن ەكسپورتتاۋدى باستايدى. بۇل تۋرالى بۇگىن ق ر ەنەرگەتيكا مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى قانات بوزىمبايەۆ ايتتى، دەپ حابارلايدى قازاقپارات ءتىلشىسى.

«اعىمداعى جارتىجىلدىقتا ءبىزدىڭ مۇناي ونىمدەرىمىزدى نەگىزىنەن ورتالىق ازيا ەلدەرىنە ەكسپورتتاۋدى باستاۋ جوسپارلانىپ وتىر. زاڭنامالىق بازا اياقتالۋعا جاقىن. ۆيتسە- مينيستر بولات اقشولاقوۆ سايكەسىنشە كەلىسىمدەردىڭ راتيفيكاتسيالانۋى مەن زاڭناماعا وزگەرىستەر ەنگىزۋ ماسەلەسىن قاتاڭ قابىلاۋعا الۋى ءتيىس» ، - دەدى قانات بوزىمبايەۆ.

 جالپى ءمينيستردىڭ دەرەگىنشە، 2018 -جىلى مۇنايدى قايتا وڭدەۋ سەكتورىندا مۇناي وڭدەۋ زاۋىتتارىن جاڭعىرتۋ جوبالارى تولىقتاي اقتالدى. ك-4, ك-5 ەۋروپالىق ستاندارتتارىنا ساي كەلەتىن مۇناي ونىمدەرىنىڭ قۋاتى مەن تەرەڭ وڭدەلۋى، ساپاسى ارتتى.

«2017 -جىلمەن سالىستىرعاندا مۇنايدى قايتا وڭدەۋ كولەمى 8,6 پايىزعا ارتىپ، 16,4 ميلليون توننانى قۇرادى. اعىمداعى جىلى 17,2 ميلليون توننا مۇناي وڭدەۋ جوسپارلانعان، بۇل 2018 -جىلمەن سالىستىرعاندا 5 پايىزعا كوپ. مۇناي ونىمدەرىنىڭ نەگىزگى تۇرلەرىن ءوندىرۋ كولەمى 2018 -جىلى 2017 -جىلعا قاراعاندا 9,4 پايىزعا ارتتى. اعىمداعى جىلعى جوسپار - 2018 -جىلعى دەڭگەيدەن 5 پايىزدىق وسىممەن 12,2 ميلليون توننا بولدى» ، - دەدى مينيستر.

ونىڭ ايتۋىنشا، وتكەن جىلدىڭ قورىتىندىسىندا نارىقتى وتاندىق مۇناي ونىمدەرىمەن قامتاماسىز ەتۋ كورسەتكىشى بەنزينمەن 93,2 پايىزدى، ديزەل وتىنىمەن 91,1 پايىزدى جانە اۆياكەروسينمەن 62 پايىزدى قۇرادى.

«اعىمداعى جىلى وتاندىق نارىقتى بەنزينمەن، ديزەل وتىنىمەن جانە اۆياكەروسينمەن قامتاماسىز ەتۋ 100 پايىزعا جەتەدى» ، - دەدى ول.