مەكتەپتەگى كيىم ۇلگىسى ۇلتتىق ءداستۇردى نەگىزگە الۋى كەرەك - سەنات ءتوراعاسى
«جاستاردىڭ دىنگە بايلانىستى قارىم-قاتىناسى ءبىزدىڭ نازارىمىزدان تىس قالىپ جاتاتىن ماڭىزدى ماسەلەلەردىڭ ءبىرى. قازاقستان بارلىق ءداستۇرلى دىندەرگە توزىمدىلىكپەن قارايتىن زايىرلى مەملەكەت بولىپ تابىلادى جانە الداعى ۋاقىتتا دا سولاي بولا بەرەتىنى انىق. ءار ءۇش جىل سايىن ەلوردا تورىندە وتەتىن الەمدىك جانە ءداستۇرلى دىندەر كوشباسشىلارىنىڭ سەزى بارشا وركەنيەت وكىلدەرىنىڭ باسىن قوساتىن جاھاندىق دەڭگەيدەگى بىرەگەي باستاما. ەلىمىزدەگى ءاربىر جاس ازامات ءوزىنىڭ ءدىني سەنىمىنەن تىس مەملەكەتكە، ونىڭ زاڭدارى مەن نىشاندارىنا قۇرمەتپەن قاراۋى ءتيىس»، - دەدى سەنات ءتوراعاسى جاستار جىلىن وتكىزۋ اياسىندا تۇرعان ماقساتتارعا ارنالعان دوڭگەلەك ۇستەل وتىرىسىندا.
ونىڭ پايىمىنشا، مەكتەپتەردەگى ءجۇرىس-تۇرىس ادەبى جانە كيىم كيۋ ۇلگىسى حالىقارالىق تاجىريبەنى، ەڭ باستىسى، حالقىمىزدىڭ ۇلتتىق داستۇرلەرىن نەگىزگە الۋى كەرەك.
«شىن مانىندە ءبىز شەتەلدەن كەلگەن جالعان ءدىني ستەرەوتيپتەردى ەمەس، ۇلتتىق داستۇرلەرىمىزدى ارقاۋ ەتۋىمىز ءتيىس. بۇگىنگى تاڭدا ءدىني سەنىمىنە بولا، بالالاردى ءبىلىم الۋ مۇمكىندىگىنەن ايىرىپ، ولاردىڭ ءبىلىم كوزدەرىنەن قول ۇزۋىنە ءماجبۇر بولعان جاعدايلار ورىن الىپ وتىر. مەنىڭ ويىمشا، بۇل ماسەلە بويىنشا ءالى دە تولىققاندى شەشىم تابىلعان جوق. سوندىقتان وسى كۇردەلى ماسەلە جونىندە كەلىسىلگەن جانە ورىندى شەشىم تابۋى ءۇشىن پارلامەنت پەن ۇكىمەتتى بىرلەسىپ جۇمىس ىستەۋگە شاقىرامىن»، - دەدى قاسىم-جومارت توقايەۆ.