ورتالىق ازياعا قاۋىپ قايدان كەلۋى مۇمكىن - ۇ ق ش ۇ شتاب باستىعىنىڭ پىكىرى
ايتا كەتسەك، بۇگىن ۇ ق ش ۇ بىرىككەن شتابىنىڭ باستىعى اناتولي سيدوروۆتىڭ «ۇ ق ش ۇ ۇجىمدىق قاۋىپسىزدىك جۇيەسىنىڭ كۇشتەرى مەن قۇرالدارىن قۇرىلىمداۋ جانە باسقارۋ ورگاندارىنىڭ بىرلەسكەن دايارلىعىنىڭ قورىتىندىسى» تاقىرىبىنداعى بريفينگى وتكەن بولاتىن. استانا - بىشكەك- ەريەۆان- مينسك ۆيدەوكوپىر فورماتىنداعى بريفينگتە شتاب باستىعى ۇيىمعا شىعىس ەۋروپا، كاۆكاز ايماقتارىنان ءتونۋى ىقتيمال قاۋىپتەردى سارالاي كەلە ورتالىق ازيا تۋرالى دا ويىمەن ءبولىستى.
«ورتالىق ازيا ايماعىنا ويىساتىن بولساق، ۇ ق ش ۇ- عا مۇشە ەلدەرگە نەگىزگى قاۋىپتى اۋعانستانداعى ءالى دە سايابىرلاماي تۇرعان قارۋلى قاقتىعىستار تۋدىرىپ وتىر. 2018 -جىلى ءارتۇرلى باندالىق قۇرىلىمدار مەن اۋعان كۇشتەرىنىڭ اراسىنداعى قاقتىعىستار وسە ءتۇستى. سونىمەن قاتار، تاليبان قوزعالىسى مەن تەرروريستىك سانالاتىن دايش- تىڭ بەلسەندىلىگى بايقالادى. اۋعانستاننىڭ سولتۇستىك وڭىرلەرىندە وسى ءۇردىستى بايقاۋعا بولادى. ونداعى تۇراقسىزدىق ەكسترەميستىك- تەرروريستىك توپتاردىڭ كۇشەيۋىنە جايلى جاعداي جاساۋدا» ، - دەيدى اناتولي سيدوروۆ.
سونىمەن قاتار، ونىڭ ويىنشا، ورتالىق ازيا ەلدەرىنە تاعى ءبىر وزەكتى قاۋىپتىڭ ءبىرى - ەسىرتكى زاتتارىنىڭ تاسىمالدانۋى بولىپ وتىر.
«تەرروريزم دەڭگەيى بويىنشا اۋعانستان قازىر الەمدەگى ەكىنشى ەلگە اينالدى. ال 2018 -جىلى زورلىق- زومبىلىقتىڭ كەسىرىنەن 3 مىڭعا تارتا بەيبىت اۋعان حالقى كوز جۇمعان» ، - دەيدى ول.
ونىڭ ايتۋىنشا، اۋعان داعدارىسىن رەتكە كەلتىرەرلىك ەلدەر اراسىندا ناقتى ديالوگ جوق.
«ۇجىمدىق قاۋىپسىزدىكتى ساقتاۋ ءۇشىن ءبىز ۇيىمعا مۇشە ەلدەرمەن بىرلەسكەن اسكەري دايىندىق جۇمىستارىن جۇرگىزىپ كەلەمىز. 2018 -جىلى ءبىز بىرلەسكەن دايارلىق تاجىريبەسىن جالعاستىردىق. بارلىق بىرلەسكەن وقۋ- جاتتىعۋ جۇمىستارى «اسكەري باۋىرلاستىق» جەدەل- ستراتەگيالىق وقۋ شارالارى اياسىندا وتكىزىلدى. وقۋ بارىسىندا شەشىم قابىلداۋ مەحانيزمدەرىن جەتىلدىرۋ، ۇجىمدىق كۇشتەردىڭ اسكەريلەرىن باسقارۋ شارۋالارى كەڭىرەك جەتىلدىرىلدى. سونداي- اق، بىرلەسكەن وپەراتسيا كەزىندە قۇرىلىمداردىڭ ارەكەتتەرىندەگى ءتارتىپتى كۇشەيتۋ ءىسى ناقتىلاندى» ، - دەدى اناتولي سيدوروۆ.