استانا قالاسىنىڭ توتەنشە جاعدايلار دەپارتامەنتى جۇمىس كۇنىن قىسقارتۋدى ۇسىندى

 استانا. قازاقپارات - ەلوردانىڭ توتەنشە جاعدايلار دەپارتامەنتى قالاداعى كاسىپورىندار مەن ۇيىمداردىڭ باسشىلىعىنا جۇمىس كۇنىن قىسقارتۋدى ۇسىندى، دەپ حابارلايدى قازاقپارات اكىمدىكتىڭ سايتىنا سىلتەمە جاساپ.

قولايسىز اۋا رايىنا جانە ايازدىڭ كۇشەيىپ كەتۋىنە بايلانىستى، جازاتايىم وقيعالاردى بولدىرماۋ ماقساتىندا استانانىڭ توتەنشە جاعدايلار دەپارتامەنتى مەملەكەتتىك ورگاندارعا، ءبىلىم بەرۋ مەكەمەلەرىنە، كاسىپورىندار (بازارلار، س و س و) ، قۇرىلىس نىساندارىنا جۇمىس كۇنىن قىسقارتۋدى ۇسىندى. «بۇل اقپارات قالانى تىرشىلىكپەن قامتاماسىز ەتۋ ۇيىمدارى، اتاپ ايتقاندا ءورت ءسوندىرۋ، پوليتسيا قىزمەتتەرى، توتەنشە جاعدايلار دەپارتامەنتى، جەدەل جاردەم قىزمەتى، كوممۋنالدىق قىزمەتتەرگە قاتىستى ەمەس» ، دەلىنگەن حابارلامادا.

«قازگيدرومەتتىڭ» مالىمەتى بويىنشا 6  -اقپاندا اۋا تەمپەراتۋراسى -30 س، الايدا -35 س بولىپ سەزىلەدى، جەل ەكپىنى 3 م/س.

 قۇتقارۋشىلار، توتەنشە جاعدايدا «112» نومىرىنە قوڭىراۋ شالۋ كەرەكتىگىن ەسكەرتتى.

 كەشە استانا اكىمى باقىت سۇلتانوۆ بارلىق ۇيىمداردىڭ باسشىلارىنا جانە جەكە كاسىپكەرلەرگە قاراتا ايازدا قالعان جاندارعا كومەك كورسەتۋگە جانە جۇمىس، وقۋ ورىندارى، تۇرعىن ءۇي- جايلارداعى جىلۋعا كوڭىل ءبولىپ، دالادا تۇرعان ادامدارعا جىلىنۋعا رۇقسات بەرۋگە، مۇمكىندىك بولسا بويىن جىلىتۋ ءۇشىن ىستىق شاي بەرۋگە شاقىرعان بولاتىن.

 سونداي- اق، ايازعا بايلانىستى استاناداعى ج و و- لاردا ساباق قىسقارتىلدى. سونىمەن قاتار، ەلوردالىق اۋدان اكىمدىكتەرى قاتتى ايازدا قانداي جەرلەردە جىلىنىپ الۋعا بولاتىندىعى جونىندە تولىققاندى اقپارات تاراتتى.