جاپون ەلشىسى: قازاق ءتىلىن ۇيرەنىپ ءجۇرمىن
بۇل تۋرالى ەلشى اقوردادا ەلباسى نۇرسۇلتان نازاربايەۆقا سەنىم گراموتاسىن تاپسىرعاننان كەيىن ايتتى، دەپ حابارلايدى قازاقپارات ءتىلشىسى.
«مەن قازاقستانداعى ديپلوماتيالىق ميسسيامنىڭ باستالۋى زور قۇرمەت ءارى قۋانىش. جاپونيا مەن قازاقستاننىڭ تاريحي ۇلكەن قارىم-قاتىناسى بار. وسى ۋاقىت ارالىعىندا ەلدەرىمىز بارلىق سالاداعى جان-جاقتى قارىم-قاتىناستى دامىتتى. ەلشى رەتىندەگى مەنىڭ ميسسيام - وسى قارىم-قاتىناستى ودان ارى دامىتۋ جانە وعان بار كۇشىمدى سالامىن»، - دەدى ەلشى ب ا ق وكىلدەرىنە بەرگەن سۇحباتىندا.
سونىمەن قاتار تاتسۋحيكو كاساي قازاق ءتىلىن ۇيرەنۋگە دەن قويىپ جۇرگەندىگىن دە اتاپ ءوتتى.
«قازاقستاندى، قازاق حالقىن، وركەنيەتى مەن سالت-ءداستۇرىن جەتە ءتۇسىنۋ ءۇشىن قازاق ءتىلىن ۇيرەنگىم كەلەدى. قازىرگى ۋاقىتتا ءتىل ۇيرەنۋمەن اينالىسىپ تا ءجۇرمىن»، - دەدى ول.
ايتا كەتەيىك، سەنىم گراموتاسىن قابىلداۋ راسىمىندە ەلباسى نۇرسۇلتان نازاربايەۆ جاپونيامەن جان-جاقتى ديالوگتى دامىتۋ قازاقستان سىرتقى ساياساتىنىڭ باسىم باعىتتارىنىڭ ءبىرى ەكەندىگىن اتاپ وتكەن بولاتىن.
«ءبىز جاپوندىق كومپانيالاردىڭ قازاقستان نارىعىنا اتسالىسۋىنا مۇددەلىمىز، بارىنشا جاعداي جاساۋعا دايىنبىز. وعان ەكى ەلدىڭ اراسىندا تىكەلەي اۋە رەيستەرىن اشۋ زور سەپتىگىن تيگىزەدى»، - دەگەن ەدى مەملەكەت باسشىسى.