نۇرلى جەر: كوپبالالى وتباسىلار ءۇشىن ارنايى ءبولىم قۇرۋدى ۇسىنامىز - جەڭىس قاسىمبەك

None
None
استانا. قازاقپارات - ق ر يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك «نۇرلى جەر» باعدارلاماسىنداعى كوپبالالى وتباسىلارعا بەرىلەتىن جالدامالى باسپانانى ارتتىرۋدى ۇسىندى، دەپ حابارلايدى قازاقپارات ءتىلشىسى.

ۇكىمەت ۇيىندە وتكەن باسپا ءسوز ءماسليحاتىندا مينيستر استانادا بولعان قايعىلى وقيعا تۋرالى پىكىر ءبىلدىردى.

«بۇل وتە قايعىلى وقيعا جانە ۇلكەن ماسەلە. بۇگىن ەربولات دوسايەۆ مىرزامەن (ق ر پرەمەر-ءمينيسترىنىڭ ورىنباسارى - رەد.) اتالعان ماسەلەگە قاتىستى ۇلكەن جينالىس وتەدى. ءبىز وسىنداي وتباسىلارعا (كوپبالالى - رەد.) قوسىمشا پاتەرلەر سالۋ ءۇشىن قاراجات ىزدەپ جاتىرمىز. «نۇرلى جەر» بويىنشا جىلىنا 700 ارەندالىق پاتەر كوپبالالى وتباسىلارعا بەرىلەتىن بولسا، ولاردىڭ سانىن 2-3 ەسەگە كوبەيتۋ كەرەك... «نۇرلى جەر» باعدارلاماسىنا كوپبالالى جانۇيالار ءۇشىن ارنايى ءبولىم قوسۋدى ۇسىنىپ وتىرمىز»، - دەدى جەڭىس قاسىمبەك ۇكىمەت ۇيىندە جۋرناليستەرگە بەرگەن سۇحباتىندا.

ونىڭ ايتۋىنشا، قازاقستاندا 28 مىڭ كوپبالالى جانۇيا جەرگىلىكتى ورگانداردا ارەندالىق باسپانا كەزەگىندە تۇر.

جالداۋ قۇنى باسپانانىڭ ءار شارشى مەترىنە 100 تەڭگەنى قۇرايدى. «ياعني، ەكى بولمەلى پاتەردىڭ ورتاشا جالداۋ قۇنى 8-10 مىڭ تەڭگە عانا. بۇل الەۋمەتتىك از قامتىلعان جاندار ءۇشىن ىڭعايلى باعا. وتكەن جىلدارى كوپبالالى جاندارعا 500-700 پاتەر بەرىلەتىن. ەندى ەلباسى تاپسىرماسىمەن ارەندالىق باسپانانى قارجىلاندىرۋدى 35 ميلليارد تەڭگەگە دەيىن ۇلعايتتىق. ەندى 4 مىڭ پاتەر سالۋدى جوسپارلاپ وتىرمىز. ءبىراق، بۇل كەزەكتە مۇگەدەكتەر، جەتىم بالالار، اۋعان سوعىسىنىڭ ارداگەرلەرى بار - ساناتتار وتە كوپ»، - دەپ ءتۇسىندىردى مينيستر.

سوڭعى جاڭالىقتار