استانا-بۋراباي اقىلى جولىنان قانشا قاراجات ءتۇستى؟

استانا. قازاقپارات - ق ر يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك استانا- بۋراباي اقىلى جولىنان قانشا قاراجات جينالاتىنىن ايتىپ بەردى، دەپ حابارلايدى قازاقپارات ءتىلشىسى.

مينيستر اتالعان جول بولىگىنىڭ ساپالى ەكەنىن، 10 جىلدا جوندەۋ جۇمىستارى جۇرگىزىلمەگەنىن اتاپ ءوتتى.

«استانا-بۋراباي جولى 2010-جىلدان بەرى قولدانىستا جانە جولدىڭ ساپاسى ەش بۇلىنگەن جوق. بۇل - بەتوننان سالىنعان قازاقستانداعى العاشقى جول، 10 جىلعا جۋىق ۋاقىتتا بىردە-ءبىر جوندەۋ جۇمىسىن قاجەت ەتپەدى. مۇندا جەڭىل اۆتوكولىكتەر ءار شاقىرىم ءۇشىن 1 تەڭگە تولەيدى، جۇك كولىكتەرى ءۇشىن تولەم قۇنى وزگەرىپ وتىرادى. ال جەرگىلىكتى تۇرعىندار ابونەمەنت الىپ، جىلىنا مىڭ تەڭگە عانا تولەيدى»، - دەدى جەڭىس قاسىمبەك ۇكىمەت ۇيىندە «وتاندىق ءوندىرىستى دامىتۋ جانە كولىك-« لوگيستيكا سالاسىن جاڭعىرتۋ» باسپا ءسوز ءماسليحاتىندا.

ونىڭ ايتۋىنشا، بۇل تولەم جولدى كۇتىپ-باپتاۋعا تولىعىمەن جەتەدى جانە ارتىلعان قاراجات وزگە جولدارعا بەرىلەدى.

«2018-جىلى استانا-بۋراباي اقىلى جولىنان شامامەن 1,5 ميلليارد تەڭگە ءتۇستى. ياعني، شاقىرىمىنا 1 تەڭگەدەن الساق تا، جول بولىگىن نورماتيۆكە سايكەس كۇتىپ-باپتاۋعا تولىعىمەن جەتەدى. ودان ارتىلعان قاراجات وزگە جولدارعا بەرىلەدى»، - دەدى مينيستر.

ەسكە سالا كەتسەك، الماتى - قورعاس، الماتى - قاپشاعاي جانە الماتى - تەمىرتاۋ جولدارى اقىلى جۇيەگە اۋىسقان بولاتىن. ءمينيستردىڭ ايتۋىنشا، الداعى ەكى جىلدا تاعى 5,5 مىڭ شاقىرىم اۆتوجول ءۇشىن اقى الىنا باستايدى.