پەتروپاۆلدىقتار جازدا مىسىرعا تىكەلەي ۇشا الادى

پەتروپاۆل. قازاقپارات - سولتۇستىك قازاقستان وبلىسىنىڭ كاسىپكەرلەر پالاتاسى شارم-ەل-شەيح قالاسىنا تىكەلەي اۋە رەيسىن اشۋ تۋرالى ماسەلەنى تالقىلادى، دەپ حابارلايدى قازاقپارات ءتىلشىسى.

پەتروپاۆلدان مىسىرلىق قالاعا العاشقى رەيس 8- ماۋسىمدا ورىندالادى. وبلىستىق كاسىپكەرلەر پالاتاسىنىڭ باسپا ءسوز قىزمەتىنەن حابارلاعانداي، تۋروپەراتوردىڭ وكىلدەرى مىسىردا دەمالۋ قىزمەتىن جولعا قويۋ تۋرالى ايتىپ بەرگەن.

«ءبىز پەتروپاۆل، كوكشەتاۋ جانە ومبى قالالارىنداعى تۋريستىك اگەنتتىكتەرگە اۋە باعدارى تۋرالى حاباردار ەتتىك. ۇسىناتىن قوناقۇيلەردى تانىستىرعىمىز كەلەدى. قازىردىڭ وزىندە ول قوناقۇيلەردىڭ نومىرلەرىنە برونداۋ جۇرگىزىلىپ جاتىر»، - دەدى شىمكەنت قالاسىنداعى تۋروپەراتوردىڭ ساتۋ ءبولىمىنىڭ باسشىسى ەكاتەرينا رۋسوۆا.

ونىڭ ايتۋىنشا، قىزىل تەڭىز جاعاسىنداعى دەمالىس قىزمەتىن پەتروپاۆلدىڭ كەز كەلگەن تۋريستىك اگەنتتىگى ۇيىمداستىرا الادى. شارم-ەل-شەيحتەگى قوناقۇيلەردەگى ءنومىردىڭ باعاسى ءبىر ادام ءۇشىن 500 تەڭگە.

«تۇركياداعى دەمالىس وتە قىمبات بولىپ كەتتى. سونىمەن قاتار، كوپتەگەن كليەنتتەرىمىز جاڭا باعىتتاردى ىزدەي باستادى. سولتۇستىك قازاقستاننىڭ ازاماتتارىن مىسىرعا تىكەلەي ۇشىرىپ، دەمالىسقا جىبەرە الاتىنىمىزعا قۋانىشتىمىز. ايماقتىڭ اۋداندارى بۇعان ەرەكشە قىزىعۋشىلىق تانىتۋدا. ولار توپ-توبىمەن كەلىپ، ساپاردى تالقىلاۋدى جوسپارلاپ وتىر»، - دەيدى «Suntravel» تۋريستىك اگەنتتىگىنىڭ ديرەكتورى ەللا اندروشۋك.

تۋريستەردى Boeing 757-200 ۇشاقتارى جەتكىزبەك. پەتروپاۆل قالاسىنداعى حالىقارالىق اۋەجايدا ورنالاسقان ۇشاق ءبىر رەتتە 235 جولاۋشىنى الىپ كەتە الادى.

«پەتروپاۆلدان تىكەلەي رەيستەردى ۇيىمداستىرۋ تۋرالى كەلىسسوزدەر سوڭعى ەكى جىل بويى جۇرگىزىلىپ كەلگەن بولاتىن. «Selfie Travel» كومپانياسىنىڭ وكىلدەرى جىل بويى تۋريستەردى ءتيىستى سۇرانىس بولعان جاعدايدا تاسىمالداۋعا دايىن»، - دەپ حابارلايدى وبلىستىق كاسىپكەرلەر پالاتاسىنىڭ باسپا ءسوز قىزمەتىنەن.