كىتاپ وقۋداعى كەيبىر ەرەجەلەر

 استانا. قازاقپارات - «وقىپ شىققاننان كەيىن «ونى ءوزىم دە جازا الامىن» دەگەن ويعا سالاتىن كىتاپتار ەڭ جاقسىلارى بولىپ تابىلادى». بلەز پاسكال 

كىتاپ - بولەك ءبىر الەم. سول الەمگە توپ ەتىپ، ونداعى الەمگە ساياحات جاساعان ادامنىڭ اقىلى مەن ساناسى قاتار وسەرى انىق. كىتاپ وقۋ - بۇل تەك بوس ۋاقىتتى قىزىق وتكىزۋ عانا ەمەس. سونىمەن بىرگە تۇلعا بولىپ قالىپتاسۋعا وراسان زور كومەگى تيەتىن وتە پايدالى ءىس. ناقتىراق ايتقاندا، بۇل پروتسەسس ويلاۋ قابىلەتىن جەتىلدىرىپ، سوزدىك قوردى ۇلعايتادى جانە سويلەۋ مادەنيەتىن دامىتىپ، مي بەلسەندىلىگىن جاقسارتادى. سونداي- اق، ءاربىر ادامنىڭ بويىنداعى شىعارماشىلىققا دەگەن سۇيىسپەنشىلىگىن وياتۋعا يتەرمەلەيدى. سول سەبەپتى، وقىرماندارىمىزدىڭ كىتاپقا دەگەن ماحابباتىن وياتۋ ءۇشىن ءارى كىتاپتى تاڭداۋدا، وقۋدا قاتەلىكتەر جىبەرمەسىن دەگەن ويمەن بىرنەشە كەڭەستىڭ ءتىزىمىن جاسادىق.

العاشقى كىتاپقا ءمان بەرۋ كەرەك

العاشقى قولعا العان كىتاپقا ەرەكشە ءمان بەرۋ كەرەك. وسى رەتتە اتا-انالارعا قۇلاققاعىس: بالاعا ەڭ الدىمەن جاسىنا، ويلاۋ قابىلەتىنە ساي كىتاپتى ۇسىنىڭىز. العاشىندا بىرنەشە تۋىندىنى وقىپ بەرگەنىڭىز ءجون. كەيىنىرەك بالالار ادەبيەتىندەگى قىسقا شىعارمالاردى وقىتىڭىز. ماسەلەن، انتۋان دە سەنت-ەكزيۋپەريدىڭ «كىشكەنتاي حانزاداسى»، حانس كريستيان اندەرسوننىڭ «جابايى اققۋلارى»، قازاق جازۋشىلارىنان بەردىبەك سوقپاقبايەۆتىڭ «مەنىڭ اتىم قوجا»، «بالالىق شاققا ساياحات» سەكىلدى كىتاپتار.

كىتاپتى بالالار ادەبيەتىنەن باستاعان ءجون

كەز كەلگەن ادام تانىم كوكجيەگىنە شىعىپ، بىلۋگە دەگەن قۇشتارلىعى ارقىلى كوپتەگەن پايدالى اقپاراتتارعا باس سۇققىسى كەلەدى. وقىرماندار دا سولاي. بالالار ادەبيەتىن شولىپ ءوتىپ، ەرتەڭ رومان- ەپوپەيالاردى پاراقتاي باستايدى. بىرەر كۇننەن سوڭ قولىندا بيزنەس كىتاپتارى جۇرەدى. ارينە، نيەتى دۇرىس. دەگەنمەن وقۋ بارىسىندا جۇيەلىككە كوپ كوڭىل بولگەن ابزال. باستاۋىش وقۋشىلارى جوعارىدا ايتىلعان كىتاپتاردى وقىماي تۇرىپ «اباي جولى» نەمەسە كوشپەندىلەردى» وقىعانىمەن، تولىقتاي ءتۇسىنىپ، وزىنە كەرەكتى دۇنيەنى الا المايدى. سول سەكىلدى، ءجاسوسپىرىم شاعىندا (مەكتەپتىڭ جوعارعى سىنىپتارى، 1-2 كۋرس ستۋدەنتتەرى) «ماحاببات، قىزىق، مول جىلداردى» وقىماعان ادام، جاسى ۇلعايعان شاعىندا قانشا تالپىنسا دا روماننىڭ قىزىعىنا باتا المايدى. دەمەك، اسقان جۇيەلىكپەن، جاسىنا قاراي اۆتورلاردى تاڭداعان ءجون.

ءوزىڭىزدى كىتاپتىڭ كەيىپكەرىنە اينالدىرىڭىز

قازاق ادەبيەتىندە وقۋعا تۇرارلىق مىڭداعان ادەبي تۋىندى بار. ولاردى وقيتىن وقىرمان دا جەتكىلىكتى. كەيدە جۇزدەگەن كىتاپتى تاۋىسىپ، الەم ادەبيەتىنە كوز تىگىپ جاتقان جاندارعا تاڭقالا قارايمىز. «وسىنشاما كىتاپتى قالاي ۇمىتىپ قالمايدى ەكەن؟» دەگەن ساۋال دا تۋىندايدى. ال، سول كىسىلەردىڭ وزگە تۇلعالاردان باستى ايىرماشىلىعى نەدە، بىلەسىزدەر مە؟ ولاردىڭ قيالدارى وتە ۇشقىر. ءار كىتاپتىڭ جەلىسىن ءوزىنىڭ ومىرىنە بالاپ، سونداعى كەيىپكەرلەردىڭ ءبىرىن ءوزى سەكىلدى قابىلدايدى. باسقا پروتوتيپتەردى اينالاسىنداعى جاقىندارىنان ىزدەيدى.

كىتاپ وقۋ جايلى قىزىقتى دەرەكتەر:

- عالىمداردىڭ ايتۋىنشا، كىتاپتى باياۋ وقۋعا قاراعاندا، جىلدام وقۋ كەزىندە كوز اناعۇرلىم از شارشايدى ەكەن.

- ادامداردىڭ 95 پايىزى كىتاپتى وتە باياۋ وقيدى - مينۋتىنا بار بولعانى 180-220 ءسوز (1 بەتتى 1,5-2 مينۋتتا).

- كىتاپتى ءداستۇرلى تۇردە وقۋدا ونى ءتۇسىنۋ دەڭگەيى 60 پايىزدى قۇراسا، جىلدام وقۋدا - 80 پايىز.

- كىتاپ وقۋ كەزىندە وقىرماننىڭ كوزدەرى ءار ءارىپتى جەكە سۋرەت رەتىندە كورسەتەدى، ال مي ولاردى ءبىر سۋرەتكە بىرىكتىرەدى.

- وقۋ داعدىسى ورتاشا ەسەپتەلەتىن ادامنىڭ كوزى كىتاپتىڭ ءبىر قاتارىنا 12-16 رەت كىدىرسە، جىلدام وقيتىندار - تەك 2-4 رەت قانا كىدىرەدى.

كىتاپ وقۋدا ەرەكشە جەتىستىككە جەتكەندەر:

- م. گوركيي مينۋتىنا 4000 ءسوز وقىعان؛

- فرانسۋز جازۋشىسى ونورە دە بالزاك جارتى ساعاتتا 200 بەتتىك روماندى وقىپ بىتىرەتىن بولعان؛

- جازۋشى، كىتاپتانۋشى ن. ا. رۋباكين ۇزىن سانى 250 مىڭ كىتاپ وقىعان؛

- ناپولەون مينۋتىنا 2000 ءسوز وقىعان؛

- توماس ەديسون ءبىر مەزەتتە كىتاپتى 2-3 قاتاردان وقىعان.