قازاقتىڭ ايگىلى مودەل قىزى اللا يلچۋن تۋرالى كىتاپ جارىق كوردى
الەمگە ايگىلى فرانسۋز ديزاينەرى كريستيان ديوردىڭ مودەلى اللا يلچۋننىڭ ءومىرى باياندالعان بۇل كىتاپتى «فرانسياداعى قازاقستاندىقتار قاۋىمداستىعىنىڭ» ءتوراعاسى، ەكونوميست بەرلين يريشيەۆ جازعان.
«كىتاپتىڭ اۆتورى بەرلين كەنجەتاي ۇلىنا ۇلكەن العىس ايتقىم كەلەدى. بەرلين يريشيەۆ تاۋەلسىز قازاقستاننىڭ بانك جۇيەسىندەگى العاشقى جەتەكشىلەردىڭ ءبىرى بولعان. كەيىنىرەك ۇزاق جىل شەت مەملەكەتتە جۇمىس ىستەدى، فرانسياداعى قازاقستان وكىلى بولدى. قازاقستاننىڭ مادەنيەتىنە دە ۇلكەن ۇلەس قوسىپ ءجۇر» ، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى ق ر ۇلتتىق اكادەميالىق كىتاپحاناسىندا وتكەن تۇساۋكەسەردە.
اۆتوردىڭ ءوزى دۇنيەجۇزىلىك ءسان الەمىنە تانىلعان تۇڭعىش ازيالىق جانە تۇڭعىش قازاق قىزى تۋرالى قوعامنىڭ حابارسىز ەكەنىن جەتكىزدى.
«كريستيان ديورمەن جۇمىس ىستەگەندە، اللا يلچۋنگە بۇكىل الەم تامسانىپ قاراعان. ول كيىپ شىققان كيىمدەر كوز ىلەسپەس جىلدامدىقپەن ساتىلىپ كەتەتىن. فوتومودەل بولىپ جۇرگەن 20 جىلدا اللا يلچۋندى الەم حالقى قىتاي دەپ ويلاپ كەلدى. سەبەبى، ول حاربيندە دۇنيەگە كەلگەن، اۋمالى- توكپەلى 1930-جىلدارى پاريجگە كوشكەن. ءبىراق، ءومىرىنىڭ سوڭعى جىلدارى مودەل جۋرناليستەرگە بەرگەن سۇحباتىندا اكەسىنىڭ قازاق ەكەنىن، قۋانتحان ەلشىننىڭ قىزى ەكەنىن مالىمدەگەن» ، - دەيدى اۆتور.
كىتاپ قاۋىمداستىق مۇشەلەرىنىڭ قاراجاتىنا جارىق كورگەن جانە باستاماشىل توپ اللا يلچۋن تۋرالى اعىلشىن، فرانسۋز، ورىس تىلدەرىندە جارىق كورگەن ماقالالاردى جيناعان.
«مالىمەت ىزدەۋ بارىسىندا كريستيان ديور مەن يۆ سەن لوران ءسان ۇيلەرىمەن بايلانىس ورناتتىق. اللا يلچۋننىڭ ءقابىرىن تاۋىپ، جالعىز ۇلى مارك جوست دە ديۋلمەنمەن كەزدەستىك. مودەلدىڭ ۇلى بۇعان دەيىن بەيمالىم بولىپ كەلگەن دەرەكتەرمەن جانە وتباسىلىق فوتوسۋرەتتەرمەن ءبولىستى. مۇنىڭ بارلىعى جاڭا كىتاپقا ەنگىزىلگەن» ، - دەيدى ب. يريشيەۆ.
اۆتوردىڭ ايتۋىنشا، ازىرگە 2,5 مىڭ دانا كىتاپ ورىس تىلىندە شىعارىلدى. الداعى ۋاقىتتا بۇل ەڭبەك فرانسۋز جانە قازاق تىلىنە اۋدارۋ جوسپارلانىپ وتىر. ودان بولەك، فرانسيالىق- يتاليالىق شىعارماشىلىق توپ اللا يلچۋن تۋرالى كوركەم فيلم ءتۇسىرۋدى ۇسىنىپ وتىر.