بار بايلىعىن «و دۇنيەگە الىپ كەتەتىن» سىعاندار تۋرالى نە بىلەمىز؟

نۇر-سۇلتان. قازاقپارات - ءاربىر حالىقتا مارقۇمدى سوڭعى ساپارعا شىعارىپ سالۋ ءراسىمى - ءوز الدىنا ەرەكشە ءداستۇر.

كوپتەگەن ۇلت قارالى شارانى بارىنشا قاراپايىم وتكىزۋگە تىرىسادى. الايدا سىعاندار سىڭايلى كوزى تىرىسىندە جيعان-تەرگەن داۋلەتىمەن قوسا جەرلەيتىندەر جوق دەۋگە بولادى.

بۇل حالىقتىڭ جەرلەۋ ءراسىمى قۇددى ءبىر سالتاناتتى ءىس-شارا سياقتى وتەدى دەپ جازادى bigpicture.ru سايتىنا سىلتەمە جاساعان NUR. KZ.

سىعاندار حريستيان بولىپ سانالعانىمەن، ءبىز بىلەتىن بۇل ءدىن وكىلدەرىنەن ولاردىڭ سالت-داستۇرلەرى الدەقايدا باسقاشا. سىعان حالقى ادام ولىمىنەن كەيىن و دۇنيەلىك ءومىردىڭ بارىنا قاتتى سەنەدى.

سول سەبەپتى، ولار كەلەسى ومىردە مارقۇمنىڭ جاعدايى بارىنشا جاقسى بولسىن دەگەن نيەتپەن، ونىڭ بار جيعان-تەرگەن بايلىعىن قوسا جەرلەيدى.

سىعانداردىڭ جەرلەۋ ءراسىمى ادامدى جەر قويناۋىنا تاپسىرۋ ەمەس، ءبىر ءزاۋلىم ۇيدەن ەكىنشىسىنە كوشۋ شاراسىنا كوبىرەك ۇقسايدى.

ءتىپتى زيرات باسىنا باراتىن جولداردىڭ ءوزى اۋقاتتى ادامدار ءۇشىن بارىنشا قولايلى ەتىپ جاسالعان.

سىعانداردىڭ باي-باعلاندار مىسىرلىق فاراوندار ىسپەتتى جەرلەنەدى. مارقۇمعا جەر استى جەكە بولمە جاسالىپ، ونى كوزى تىرىسىندە جاقسى كورگەن زاتتارىمەن جابدىقتايدى.

بەيىت باسىنا قويلاتىن ەسكەرتكىشتىڭ ءوزى سىعاندار ءۇشىن اسا ماڭىزدى بولىپ سانالادى. وندا قايتىس بولعان ادامنىڭ ات ۇستىندەگى نەمەسە كولىكتەگى سۋرەتىن سالادى.

مارقۇم جيھاز، قىمبات ىشىمدىك، تەحنيكا، ۇيالى تەلەفوندار مەن التىن بۇيىمدارمەن قوسا جەرلەنەدى.

وعان قوسا، ونىڭ كۇندەلىكتى ومىردە قولدانعان جەكە زاتتارى دا جەر استىنا كەتەدى.

كەيدە قايتىس بولعان ادامعا بىرنەشە بولمەدەن تۇراتىن جەر استى پاتەر سالىپ بەرەدى. ەڭ اۋقاتتى دەپ تانىلعان سىعان كولىكتەرىنە تولى گاراجىمەن جەرلەنەدى.

الايدا بۇل قۇبىلىس وتە سيرەك كەزدەسەدى. بۇل حالىق وكىلدەرىنىڭ بارلىعى دەرلىك مۇنداي قادامعا كەلىسپەيدى.

ەڭ سوڭىندا، تابىت جەر قويناۋىنا تۇسكەننەن كەيىن، جەرلەۋ راسىمىنە كەلگەن ايەلدەر ۇستىندەگى التىن بۇيىمداردى شەشىپ، مارقۇمنىڭ جەر استى ۇيىنە لاقتىرادى.