وتەجان اقىننىڭ جۇلدىزى
سالەم ءساتى ءتۇسىپ، اقىن وتەجان نۇرعاليەۆتىڭ ۇيىنە باس سۇقتىم.
اتى الاتاۋداي بولعانمەن، قۇجىراسى كۇڭگىرت اقىننىڭ كىتاپحاناسى بىردەن قىزىقتىردى. سورەلەر مايىسىپ تۇر. كوزىمدى كوپ كىتاپقا ساتىپ، ەبىن تاۋىپ باعاسىنا قاراي وتىرىپ، بىرنەشەۋىنە قول جەتكىزدىم.
- سەن بىلەسىڭ بە؟ ادەبيەتتە ۇستاز دا، شاكىرت تە جوق. ۇستازىڭ بولسا، ءولدىڭ. ابايدىڭ تۇل بولعانى سول. شاكارىم دە وعان ۇقساعان جوق. كىتابىم شىقپاعالى 20 جىلداي بولدى. سىيلايتىن ءبىرلى- جارىم ادامدار ءولىپ ءبىتتى. قاراتاسقا اينالىپ اباي تۇر. قۇلاق جوق. تىڭدامايدى. جاۋلار قالعىمايدى. ولار مەنىڭ ولگەنىمدى كۇتىپ وتىر. ولگەن كۇنى تىرىدە قيا المايتىن بىرەر اۋىز ءسوزىن سىيلاپ، قايتىپ ءتىرىلىپ كەتپەسىن دەپ تاسپەن باستىرىپ قويادى، - بۇل وتەجان اعانىڭ العاشقى اڭگىمەدەگى مەنىڭ ساۋالىما بەرگەن جاۋابى ەدى.
اراداعى اڭگىمە ۇزاققا سوزىلعان. كەيىن دە «جاس قازاق ءۇنى»، «ءۇشقوڭىر» گازەتتەرىندە سۇحبات تۇرىندە دە بەرىلگەن. ءسوز اراسىندا ول كىسىدەن:
- ءوزىڭىز اقيقاتتىڭ ءبارىن ايتىپ وتىرسىز. ال وسى ماسەلەلەر جەكە شىعارماشىلىعىڭىزدا قالاي؟ - دەگەندى سۇراپ قالدىم.
- ءوزىم وسىنىڭ ءبارىن ايعايلاپ ايتقىم كەلسە دە، ءالسىز عانا جانمىن. قازاقتىعىم قايناپ تۇرسا دا، بولمىستى جەڭە المايمىن. قوعامعا كەرەكسىزبىن. اركىم اڭگىمەلەسكىسى كەلەدى. ەكىنشى رەت قاشادى: «قىرت شال» دەپ قورقادى. سەن دە ەكى كەلمەيسىڭ. قازىرگىلەرگە اشى سىن ەمەس، ماقتاساڭ جاعاسىڭ. مەن جاقپايمىن. ونى وزىڭدە اڭعارىپ وتىرسىڭ. ۇعاتىن قۇلاق بولسا، كەزىندەگى «افينانىڭ مەكتەبىندە» ءبارىن ايتقانمىن. جاۋلارىم كوپ. قۇرتقىسى كەلەدى. قۇرتاتىنى - بىلمەۋ. باياعىدا جوڭعارلاردىڭ قولىنا تۇسكەن ءبىر بالا اتتىڭ قۋ باسىن قۇشاقتاپ: «سەنى تۇلپاردىڭ باسى دەپ كىم ايتادى، مەنى تولىباي سىنشىنىڭ بالاسى دەپ كىم ايتادى» دەپ زار جىلاپ وتىرىپتى دەيتىن اڭىز بار. سول بالانى جوڭعارلار تاۋىپ الىپ ات سىناتىپ، ات باقتىرادى. جالعىز-اق كۇندە ەڭ جۇيرىك تۇلپاردى ءمىنىپ، جۇلدىزشا اعىپ ەلىنە كەلەدى. مەنىڭ «جوڭعارىم دا»، «قازاعىم دا» جوق، - دەپ مۇڭىن شاققان اعامىز. ءسوزىنىڭ سوڭىندا:
- بريلليانت دەگەن جىلتىراق تاس بار. بىلاي قاراساڭ، جاي عانا تاس. قىرلاساڭ، قىمبات باعالى اسىل. ءبىزدىڭ ادەبيەتىمىز بەن تاريحىمىزعا دا سونداي قىر كەرەك. ءبىرىمىزدى ءبىرىمىز كوتەرسەك، قازاقتى كوتەرەمىز. قازاقتى كوتەرىپ، حالقىمىزدىڭ ءتورت قۇبىلاسىن تۇگەندەسەك اق جۇلدىزىمىز تۋادى، - دەيدى.
سونان بەرى دە تالاي جىل ءوتتى. ول كىسىنى اتتاناردا اۋىز جاپپاي «ماقتاعان» قاۋىمى «قارا تاستىڭ استىنا باستىرىپ» قويدى. ءپاني مەن باقيدىڭ اراسى شالعاي، ءۇنى جەتپەيدى. الاتاۋ مەن ارقانىڭ اسپانىندا سام جامىراعان سايىن، زەڭگىر كوككە تەلمىرىپ، قازاق اقىنى وتەجان نۇرعاليەۆتىڭ جۇلدىزىن ىزدەيمىن.
اسپاندا سانسىز مونشاق جىلتىرايدى. اعامىز ارمانداپ كەتكەن اق جۇلدىز ءالى تۋماپتى. مەن كوك اسپانعا تەلمىرگەن سايىن، شوعىرلى جۇلدىزدار تۇكپىرىنەن: «ادەبيەتتە ۇستاز دا، شاكىرت تە جوق!» دەگەن ءبىر ءۇن جاڭعىرىعىپ، قۇلاعىمدا كۇمبىرلەيدى. يەسىن تاپپاي دال بولامىن. وتەجاننىڭ جۇلدىزى...؟
ءجادي شاكەن ۇلى، «قازاق ءۇنى»