دانيار اقىشەۆ بانكتەردىڭ جۇمىسىن قاداعالاۋدىڭ جاڭا مودەلىن ۇسىندى
«وتكەن جىلى ۇلتتىق بانككە دالەلدى پايىم نەگىزىندە تاۋەكەلدەردى قاداعالاۋعا مۇمكىندىك بەرەتىن زاڭنامالىق بازا وزگەرتىلدى. شىندىعىندا، بانكتەردىڭ جۇمىسىن قاداعالاۋ پاراديگماسى وزگەردى»، - دەدى ۇلتتىق بانك ءتوراعاسى مەملەكەت باسشىسىنىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا.
دانيار اقىشەۆ اتاپ وتكەندەي، بۇعان دەيىن كەيبىر بانكتەر باقىلاۋشىنىڭ تەكسەرىسى ارالىعىندا جۇمىستارىن جۇرگىزگەن. ياعني، تەكسەرۋ جۇمىستارىنىڭ اراسىنداعى كەزەڭدەردە دايەكسىز ەسەپتەر ارقىلى كەيبىر جايسىز جاعدايلار ايتىلماي قالعان.
«ەندىگى كەزەكتە پروتسەستىڭ نەگىزى - تۇراقتى تۇردە قاشىقتىقتان باقىلاۋ بولماق. اتاپ ايتقاندا، بيزنەس- مودەلدەردى باعالاۋ، كورپوراتيۆتى باسقارۋ، تاۋەكەلدەردى، كاپيتالدى، قارجىلاندىرۋدى باسقارۋ جۇيەسى سەكىلدى پروتسەستەر قاداعالانادى. وسى پروتسەستەردىڭ بارلىعى دا تاۋەكەل دارەجەسىنە قاراي كەشەندى تەكسەرۋدەن وتەدى»، - دەدى دانيار اقىشەۆ.
ونىڭ ايتۋىنا قاراعاندا، وسىنداي مونيتورينگتىڭ كومەگىمەن بانكتىڭ احۋالىنا تۇراقتى تۇردە باقىلاۋ جۇرگىزىلىپ وتىرادى. تەسكەرىستىڭ ناتيجەسىنە قاراي، قاتاڭدىعى ءارتۇرلى دارەجەدەگى، اتاپ ايتقاندا كەڭەستەردەن باستاپ بانك وپەراتسيالارىن شەكتەۋگە دەيىنگى شارالار قابىلداناتىن بولادى.
«بۇل ادىستەمەنى ۇلتتىق بانك Rothschild ينۆەستيتسيالىق كومپانياسىمەن جانە اۋديتورلىق PricewaterhouseCoopers كومپانياسىمەن بىرگە ازىرلەدى»، - دەدى دانيار اقىشەۆ.