ديماش قۇدايبەرگەن: ماسكەۋدەگى جەكە كونسەرتىمدە جاڭا اندەر شىرقالادى

استانا. قازاقپارات - ءانشى ديماش قۇدايبەرگەن ماسكەۋدەگى مەملەكەتتىك كرەمل سارايىندا وتەتىن جەكە كونسەرتىنە دايىندىق بارىسى تۋرالى ايتتى، دەپ حابارلايدى قازاقپارات ءتىلشىسى.

«22-ناۋرىز كۇنى ماسكەۋدەگى كرەمل سارايىندا مەنىڭ رەسەيدەگى ەڭ العاشقى جەكە ءان كەشىم وتكەلى جاتىر. ول كونسەرتتىڭ بۇرىنعى كەشتەردەن وزگەشە تۇستارى كوپ. ويتكەنى، مەن كونسەرتتىك باعدارلامانى جاساعان كەزدە ءار قالاعا، ءار ەلگە بايلانىستى كىشكەنە وزگەرىستەر ەنگىزەمىن. سول سەبەپتى، رەسەيدە وتەتىن كونسەرتىمدە رەپەتۋارىما جاڭادان ەنىپ جاتقان اندەر مىندەتتى تۇردە ورىندالادى»، - دەدى ديماش قۇدايبەرگەن و ك ق- دا وتكەن باسپا ءسوز ءماسليحاتىندا.

ەسكە سالا كەتسەك، بۇعان دەيىن و ك ق- دا وتكەن باسپا ءسوز ءماسليحاتىندا ديماش قۇدايبەرگەن جاستار جىلى اياسىندا استانادا كونسەرت بەرەتىنىن ايتقان ەدى.

«ءبىز سىزدەرمەن ۇلكەن ماڭىزدى جاڭالىقتى بولىسكىمىز كەلەدى. ءبىز ءوز تاراپىمىزدان تالانتتى جاستاردى قولداۋعا دايىنبىز. ونىڭ ۇستىنە وزدەرىڭىز بىلەتىندەي، بيىلعى جىل جاستار جىلى دەپ جاريالانعان بولاتىن. ديماش - ەلىمىزدىڭ، حالقىمىزدىڭ ءبىرتۋار ازاماتى، قازاقتىڭ ونەرى ارقىلى ەلىمىزدىڭ اتىن بۇكىل الەمگە تانىتىپ جۇرگەن تالانتتى تۇلعا. بۇنىڭ الدىندا ديماش ۇلتتىق ارناداعى جاڭا جىلدىق شوۋعا قاتىسقان بولاتىن. ال بۇگىنگى ايتىلىپ جاتقان جوبا بويىنشا ءبىز ديماشپەن بىرنەشە رەت كەزدەسىپ، اقىلداسقان بولاتىنبىز»، - دەگەن ەدى «قازاقستان» ر ت ر ك ا ق باسقارما ءتوراعاسى ەرلان قارين.