وتىراردا جاس ماماندارعا الەۋمەتتىك تۇرعىن ءۇي بەرىلەدى

تۇركىستان. قازاقپارات - تۇركىستان وبلىسى، وتىرار اۋدانىنىڭ اكىمى ەرلان ايتاحانوۆتىڭ قاتىسۋىمەن جاستارمەن جۇمىس جۇرگىزۋ جونىندەگى كەڭەستىڭ كەزەكتەن تىس وتىرىسى ءوتتى.

باس قوسۋعا زيالى قاۋىم مەن بەلسەندى جاستار جانە ب ا ق وكىلدەرى قاتىستى، دەپ حابارلايدى قازاقپارات ءتىلشىسى.

جاستار جىلىنىڭ اشىلۋى مەن سول جيىندا ەلباسى نۇرسۇلتان نازاربايەۆتىڭ بەرگەن تاپسىرمالارى كەزەكتەن تىس وتىرىسقا ارقاۋ بولدى. اۋدان باسشىسى ۇلت كوشباسشىسى تاپسىرماسىنىڭ ەرەكشەلىگىنە توقتالىپ، الداعى اتقارىلار جۇمىستاردى ايتىپ ءوتتى.

اكىم جاستار رەسۋرستىق ورتالىعىنىڭ جاڭادان تاعايىندالعان ديرەكتورى - كەڭەس حاتشىسى، ايتىسكەر اقىن داۋرەن اقساقالوۆتى كوپشىلىككە تانىستىرىپ، جوسپارلارىنا سەنىم ءبىلدىردى. جيىندا قازاقستاننىڭ حالىق اقىنى، «پاراسات» وردەنىنىڭ يەگەرى اسەلحان قالىبەكوۆا جاستار جىلىنىڭ اشىلۋىمەن قۇتتىقتاپ، تولعامدى ويلارىمەن ءبولىستى. ال، جاس كاسىپكەر اسحات تاسىبايەۆ پەن ارحەولوگ شىناز الماز ۇلى جانە ءداستۇرلى ءانشى ۇلجالعاس ءابىلداحاندار ءوز سالالارى بويىنشا جەتىستىكتەرىنە توقتالدى.

ايتا كەتسەك، بۇگىنگى تاڭدا وتىرار اۋدانىنداعى جاستار سانى 13162 ادامدى قۇرايدى. ولاردىڭ بوس ۋاقىتىن ءتيىمدى پايدالانۋ مەن قولداۋ كورسەتۋ، ءتۇرلى سالالار بويىنشا باعىت-باعدار بەرۋ مەن شىڭدالۋىنا جول اشۋ ماقساتىندا مادەنيەت، ءبىلىم، سپورت سالالارىنان ءتۇرلى ۇيىرمەلەر جۇمىس ىستەيدى. اۋداندا سونداي-اق جاس ماماندارمەن قامتۋ جانە جۇمىسسىزدىقپەن كۇرەس ماسەلەسى دە باستى نازاردا.

جيىن بارىسىندا وسى جايتتەر جونىندە وي بولىسكەن اۋدان باسشىسى جاستار ورتالىعى مەن جۇمىسپەن قامتۋ جانە الەۋمەتتىك باعدارلامالار ءبولىمى باسشىلارىنا جۇمىسسىز جاستاردىڭ ناقتى سانىن انىقتاپ، كاسىپتىك ءبىلىم بەرۋ جانە جۇمىسقا ورنالاستىرۋ ماسەلەسىن ءبىرىنشى كەزەكتە قولعا الۋدى تاپسىردى. كاسىپكەرلىك سالاسىنا جول اشىپ، قولداۋ ءبىلدىرۋ دە كەڭىنەن تالقىلاندى.

سونداي-اق، ەرلان ايتاحانوۆ اۋداندا بوي كوتەرىپ جاتقان الەۋمەتتىك ۇيلەردىڭ باسىم بولىگى جاس ماماندارعا بەرىلەتىنىن جەتكىزدى. باس قوسۋدا بۇدان وزگە قوعامدا ورىن الىپ جاتقان قۇقىق بۇزۋشىلىقتاردىڭ الدىن الۋ، ءتارتىبى قيىن جاستارمەن ءتيىمدى جۇمىس جۇرگىزۋ ماسەلەسى دە قوزعالدى.

«قوعامنىڭ قوزعاۋشى كۇشى، ەگەمەن ەلدىڭ ەرتەڭى بولاتىن جاستار ماسەلەسى تەك بيىلعى جىلمەن شەكتەلمەي، جاس مامانداردى پاتەرمەن جانە جۇمىسپەن قامتاماسىز ەتۋدى ءاردايىم باستى نازاردا ۇستايتىن بولامىز. جاستارعا قولداۋ كورسەتۋ، وقىتۋ، جۇمىسپەن قامتۋ باعىتىنداعى ءاربىر جۇمىسقا اۋىلدىق وكرۋگ اكىمدەرى مەن ءار سالانىڭ باسشىلارى دا تىكەلەي اتسالىساتىن بولادى»، - دەدى ءسوزىن قورىتىندىلاعان اۋدان باسشىسى.

ول ءتيىستى مەرزىمدەردى كورسەتە وتىرىپ، سالا باسشىلارىنا ءبىرقاتار اۋقىمدى تاپسىرمالار جۇكتەدى.