استانا جاستارىنا ءتۇرلى سالا بويىنشا تەگىن كەڭەس بەرىلدى
شاراعا استانا قالالىق قوعامدىق دەنساۋلىق ساقتاۋ باسقارماسى، «ازاماتتارعا ارنالعان ۇكىمەت» مەملەكەتتىك كورپوراتسياسى، جۇمىسپەن قامتۋ ورتالىعى، مەدياتسيانى دامىتۋ ورتالىعى جانە تۇرعىن ءۇي قۇرىلىس جيناق بانكىنىڭ وكىلدەرى قاتىستى.
سونىمەن قاتار، كاسىبي زاڭگەر مەن پسيحولوگ ماماندار جاستارعا تەگىن كونسۋلتاتسيا جۇرگىزدى. قالاداعى «حانشاتىر» ويىن- ساۋىق ورتالىعىندا وتكەن اشىق ەسىك كۇنىندە جاستار ءوزىن قىزىقتىرعان ساۋالدارعا جاۋاپ الدى.
«بۇگىنگى اشىق ەسىك كۇنىندە جاستاردىڭ بارلىق سۇراعىنا تولىققاندى جاۋاپ بەرىلدى. جاستاردى نەگىزىنەن جۇمىسقا ورنالاسۋ، حالىققا قىزمەت كورسەتۋ ورتالىعىنىڭ قىزمەتى، باسپانا، ءوز كاسىبىن اشۋ جانە تاعى باسقا ماسەلەلەر مازالايدى. اتالعان شارا وتكەن جىلى باستالىپ، بيىل ءوز جالعاسىن تابۋدا. وتكەن جىلدىڭ قورىتىندىسى بويىنشا مىڭعا جۋىق جاسقا كەڭەس بەرىلدى. جانە الداعى ۋاقىتتا اتالعان شارانى ەلوردانىڭ ادامدار كوپ شوعىرلانعان ورىندارىندا وتكىزە بەرەمىز» ، - دەدى «استانا جاستارى» مەملەكەتتىك مەكەمەسىنىڭ باسشىسى ۇكىباي نۇرپەيىسوۆ.
ونىڭ ايتۋىنشا، وڭىرلەردەن استاناعا ءناپاقا تابۋ ءۇشىن كەلىپ، بازاردا نەمەسە باسقا جەرلەردە جۇرگەن جاستار ءتۇرلى مۇمكىندىكتەردىڭ بار ەكەنىن بىلە بەرمەيدى. شارانىڭ ماقساتى - سولارعا قول ۇشىن سوزىپ، مەملەكەت تاراپىنان قاراستىرىلعان مۇمكىندىكتى پايدالانۋعا شاقىرۋ.
ايتا كەتسەك، استانا قالاسى اكىمدىگىنىڭ «استانا جاستارى» مەكەمەسى ۇيىمداستىرعان بۇل شارا «جۇمىسپەن قامتۋ جانە الەۋمەتتىك باعدارلاما جول كارتاسىن» جۇزەگە اسىرۋ اياسىندا جۇرگىزىلۋدە.