كولىك كەپتەلىسى دەنساۋلىققا زيان - عالىمدار

نۇر-سۇلتان. قازاقپارات - كەيدە ومىرىمىزدەگى ۇساق-تۇيەك دۇنيەلەردىڭ ۋاقىتىمىزدى العاننان باسقا ەش زيانى جوقتاي كورىنەدى.

مىسالى، كولىك كەپتەلىسىندە جولدا بوس تۇرعاندى ەشكىم ۇناتپايدى. دەگەنمەن، ونىڭ باسقا دا كەمشىلىگى بار بولىپ شىقتى، اسىرەسە كولىك كەپتەلىسىنىڭ قوعامدىق دەنساۋلىق سالاسىنا زيانى كوپ كورىنەدى.

The New York Times جاريالاعان ماقالادا اۆتور تەحاس كولىك ينستيتۋتى امەريكا تۇرعىندارى جىلىنا ورتاشا ەسەپپەن 42 ساعاتىن كولىك كەپتەلىسىندە وتكىزەتىنىن جازادى. ال سوڭعى جۇرگىزىلگەن زەرتتەۋلەرگە سەنسەك، كولىك كەپتەلىسى اۋانى لاستاپ قانا قويماي، ادامنىڭ دەنساۋلىعىنا كەرى اسەر ەتەدى ەكەن.

«كەپتەلىس كەزىندە ۋاقىتتى بوسقا وتكىزگىسى كەلمەگەندەر كولىك ىشىندە باسقا ىسپەن اينالىسىپ وتىراتىنى ايتپاسا دا تۇسىنىكتى. دەگەنمەن، جول كەپتەلىسى ادامنىڭ فيزيكالىق دەنساۋلىعىنا دا، پسيحولوگيالىق ساۋلىعىنا دا اسەر ەتەدى»، دەپ جازادى باسىلىم.

اۆتوردىڭ ايتۋىنشا، عالىمداردىڭ زەرتتەۋى تۋرالى قوعامدىق ەكونوميكا جۋرنالىندا كولەمدى ماتەريال جاريالانعان. وندا ءتىپتى كولىك كەپتەلىسىنىڭ ارتۋى وتباسىنداعى كيكىلجىڭدەر مەن زورلىق- زومبىلىقتىڭ وسۋىنە الىپ كەلەتىنى جازىلىپتى. سونداي-اق عالىمدار كولىكتەن باس تارتىپ، جاياۋ نەمەسە ۆەلوسيپەدپەن جۇرەتىندەر دەنساۋلىعىن جاقسارتىپ، جول قوزعالىسىنىڭ كەرى اسەرىنە ۇشىرامايتىنىن انىقتاپتى.