جالعىزدىقتان ارىلۋعا كومەكتەسەتىن كولىك ءتۇرى انىقتالدى

نۇر-سۇلتان. قازاقپارات - ەۋروپا عالىمدارى بىرلەسكەن جاڭا زەرتتەۋ جۇمىسى ۆەلوسيپەدتىڭ ادام دەنساۋلىعىنا ايتارلىقتاي پايداسى بار ەكەنىن انىقتادى.

ول ادامنىڭ فيزيكالىق قانا ەمەس، پسيحيكالىق دەنساۋلىعىن دا جاقسارتادى جانە جالعىزدىق سەزىمىنەن ارىلۋعا كومەكتەسەدى. بۇل تۋرالى Environment International جۋرنالىندا جاريالانعان زەرتتەۋ جۇمىسىندا ايتىلدى.

ەۋروپا وداعى قارجىلاندىرعان PASTA زەرتتەۋى اتالعان ايماقتىڭ جەتى قالاسىندا جۇرگىزىلدى. ولار - انتۆەرپەن، بارسەلونا، لوندون، ەرەبرۋ، ريم، ۆەنا جانە تسيۋريح. بازالىق ساۋالنامانى 8800 ادام تولتىرىپ، ولاردىڭ ىشىندە 3500 ى كولىك پەن دەنساۋلىققا بايلانىستى تاعى ءبىر ساۋالناماعا اتسالىستى.

ساۋالنامادا نەگىزىنەن قانداي كولىك ءتۇرىن پايدالاناتىندىعى جانە دەنساۋلىق جاعدايلارىنا قاتىستى سۇراقتار بولدى. رەسپوندەنتتەر اتاعان كولىكتەر تىزىمىنە اۆتوموبيل، موتوتسيكل، قوعامدىق كولىك، ۆەلوسيپەد، ەلەكتروۆەلوسيپەد كىردى. سونداي-اق، كوبىنەسە جاياۋ جۇرگەندى ۇناتاتىن ادامدار بارى انىقتالدى.

زەرتتەۋ جۇمىسىنىڭ ناتيجەسى بويىنشا، ۆەلوسيپەدتىڭ ادام دەنساۋلىعى ءۇشىن ايتارلىقتاي پايدالى ەكەنى دالەلدەندى. كوپتەگەن ادام ونى ايداپ كەلە جاتقان كەزدە جالعىزدىق سەزىمىنىڭ بۇرىنعىداي جاندى اۋىرتپايتىنىن، وزدەرىن الدەقايدا سەرگەك سەزىنەتىندەرىن ايتقان.

ەكىنشى ورىندا جاياۋ ءجۇرۋ تۇر. كولىكتى پايدالانبايتىنداردىڭ دوستارىمەن جانە وتباسى مۇشەلەرىمەن قارىم-قاتىناسى وزگەلەرىنە قاراعاندا جاقسى بولادى ەكەن.

اناليز بارىسىندا اۆتوموبيل ايدايتىن ادامداردىڭ وزدەرىن جالعىز سەزىنەتىندەرى بەلگىلى بولدى. سونداي-اق، كولىكتىڭ بۇل ءتۇرىن پايدالاناتىنداردىڭ ۇنەمى كوڭىل-كۇيى ءتۇسىپ جۇرەتىنى انىقتالدى.