مايرا ءىلياسوۆا ديماشتى سىناعان زايىتوۆتى ورنىنا قويدى

 استانا. قازاقپارات - وتاندىق تانىمال ءانشى مايرا ءىلياسوۆا ديماش قۇدايبەرگەندى سىنعا العان ايتىسكەر رينات زايىتوۆقا جاۋاپ بەردى.

ەسترادا جۇلدىزى قازاقتىڭ اتىن كۇللى الەمگە تانىتىپ جۇرگەن جاس ونەرپازدى جاقتاپ، بەلگىلى اقىنعا قارسى شىقتى دەپ جازادى Sputnik قازاقستان.

مايرا ءىلياسوۆا تۋما تالانتقا قاتىستى بار ويىن ورتاعا سالعان رينات زايىتوۆتىڭ پىكىرىمەن تولىقتاي كەلىسپەيتىنىن ايتىپ، ايتىسكەردىڭ ءوزىن سوگىپ تاستادى.

«بۇل - ريناتتىڭ ساۋاتسىزدىعى. ەگەر رينات ءانشى بولىپ، ونەرگە ءبىر تابان جاقىن بولعانىندا مۇنداي اڭگىمە ايتپاس ەدى. بۇكىل دۇنيەنى مويىنداتىپ جاتقان، مىقتى پروفەسسور، الەمدىك دەڭگەيدەگى مامانداردىڭ باعاسىن الىپ جۇرگەن ديماشقا نەگە ونداي پىكىر ايتادى؟ بۇل ءوزى ءبىزدىڭ قازاقتىڭ قانىندا بار. بولسىن دەمەيمىز، ەتەكتەن تارتامىز. ديماشقا مۇلدەم قاتىسى بولماسا دا، اۋزىنا كەلگەندى ايتىپ جاتىر. ال وعان قارا حالىق بەتكە ايتتى دەپ قول سوعادى. كەيبىرەۋ ونىڭ ءسوزىن دە ءتۇسىنىپ جاتقان جوق. ريناتقا ونداي ءسوز ايتۋ ۇيات.

قىتايعا دەيىن ءبىزدىڭ ديماش «سلاۆيان بازارىنا» بارىپ گران-پري الىپ كەلدى. ونىڭ الدىندا ديماش پرەزيدەنتتىك شاكىرتاقى الدى. ديماش - مەن ساباق بەرەتىن فاكۋلتەتتىڭ، مەن ساباق بەرەتىن وقۋ ورداسىنىڭ شاكىرتى. ءبىز وعان ءتىل تيگىزۋگە جول بەرمەيمىز. رينات ءوز سالاسىندا، ايتىستا مەيلى پروفەسسور بولسىن، ال ديماشتا شارۋاسى بولماسىن. ەگەر ديماشتىڭ داۋىسىن بىلمەسە، وندا وعان سىن ايتۋدىڭ قاجەتى جوق.

ديماش حالىقارالىق كونكۋرسقا قىتايدا ەمەس، انگليادا قاتىسسا دا ءدال سولاي تانىلۋشى ەدى. ءدال سولاي وزىنە لايىق باعاسىن الۋشى ەدى. «ايەل داۋىستىلاردى جەك كورەمىن» دەگەن ريناتتىڭ تاعى ءبىر پىكىرى بار. ول ايەل داۋىس ەمەس. ول ءبىزدىڭ تاريحىمىزدا بار. بىزدە جوعارى نوتادا ايتاتىن ەرىك قۇرمانعاليەۆ بولدى. ءبىز - انشىلەر دەگەن ۇلكەن قوعامبىز. ءبىز - ءبىر ارميامىز. ەگەر وسى ءىسىن قويمايتىن بولسا، ءبىز ونى توقتاتا الامىز. رينات -  سەمەيلىك مەنىڭ جەرلەسىم، باۋىرىم. جارقىراپ شىققان كەزدە بارلىعىمىز ريناتجان دەپ قولدادىق. قۇرمەت كوردى. قازىر ءدال سول قۇرمەتتى ديماش كورىپ جاتىر.

ەشكىم ءوزى بىلمەيتىن سالانى قوزعاماعانى دۇرىس. بۇكىل الەم مويىنداپ وتىرعان ديماشتى تۇككە تۇرمايتىن ارزان اڭگىمەمەن سىناۋدىڭ قاجەتى جوق. ديماشتىڭ دا جۇرەگى اۋىرادى عوي. وسى ارەكەتى ءۇشىن مەن رينات ءۇشىن ۇيالدىم. ديماش الدىمەن ءوزىن قازاققا تانىتتى. ال قىتاي مەن رەسەيدىڭ، انگليانىڭ جاساعان جارناماسىنا ءبىزدىڭ شاشىمىز جەتپەيدى. قازاق قازاقتى مويىنداۋ ءۇشىن قىتايدى مويىنداتۋى كەرەك بولدى دەگەن پىكىرمەن تۇبەگەيلى كەلىسپەيمىن»، - دەدى مايرا ءىلياسوۆا.