استاناعا كولىكپەن كىرۋ اقىلى بولادى

استانا. قازاقپارات - وسى سەنبىدەن باستاپ الماتى- قورعاس، الماتى- قاپشاعاي، استانا- تەمىرتاۋ جولدارى اقىلى بولادى.

ەلىمىزدەگى اقى تولەپ وتەتىن جولداردىڭ ساپاسىن ايتپاعاندا، باعاسى الەم بويىنشا ەڭ ءتيىمدىسى ەكەن. ماماندار پىكىرى وسىعان سايادى.

استانادان تەمىرتاۋعا قاتىنايتىن جولاۋشىلار ەندى اقىلى جولمەن ءجۇرىپ وتەدى. 134 شاقىرىمعا سوزىلعان اۋماقتان تاۋلىگىنە 7000 كولىك قوزعالادى. دەمالىس كۇندەرى ءنوپىر ەكى ەسەگە دەيىن ارتادى. اقىلى بەكەتتەن وتكەن ءاربىر اۆتو ارنايى باعدارلاما ارقىلى جۇيەگە ەنگىزىلەدى.

ەريك شارشەنوۆ، IT- قىزمەتىنىڭ باسشىسى:

 - بۇل - وتاندىق باعدارلاما. ءوزىمىز ازىرلەپ، سوڭعى جۇمىستارىن جۇرگىزىپ جاتىرمىز. شەتەلدىك انالوگتارعا قاراعاندا اناعۇرلىم ءتيىمدى. جۇيەنى ءوتىپ جاتقان كولىكتەرمەن تەكسەرىپ جاتىرمىز. ءبىز كامەرا ارقىلى ونىڭ ءنومىرىن انىقتايمىز، سوعان قاراي ونىڭ اۋىر نە جەڭىل كولىك ەكەنى بەلگىلى بولادى. جول اقىسى وسىلاي ەسەپتەلەدى. جۇرگىزۋشى كەستەدە كورسەتىلگەن سومانى تولەي بەرەدى.

ەرتەڭنەن باستاپ استانا تەمىرتاۋدان بولەك الماتى- قورعاس، الماتى- قاپشاعاي جولدارى دا اقىلى. بەكەت ارقىلى كۇندە قاتىنايتىن جۇرگىزۋشىلەر ءبىر رەت مىڭ تەڭگە تولەپ، جىل بويى تەگىن جۇرۋگە قۇقىلى. ال وتەمدى الدىن الا جاساعان جەڭىل كولىك تىزگىنشىلەرى 50 پايىزدىق جەڭىلدىككە يە بولادى. تولەم ەلىمىزدەگى 100 مىڭ تەرمينالدىڭ بىرىنەن نە ينتەرنەت- بانكينگ ارقىلى جۇرگىزىلەدى.

باۋىرجان بيشەنوۆ، باسقارما ءتوراعاسىنىڭ ورىنباسارى:

- 2020 -جىلعا دەيىن بىزدە 6,5 مىڭ شاقىرىم اقىلى جول ىسكە قوسىلادى. ول استانا- قوستاناي- ترويتسك، استانا- پاۆلودار، پاۆلودار- قالباتاۋ، تولىقتاي باتىس ەۋروپا- باتىس قىتاي اۋماعى اقىلى بولادى.

 ايتا كەتەرلىگى، ورالدان، اقتوبە، قىزىلوردا باعىتىندا تەك جۇك كولىكتەرىنەن عانا اقى الىنادى. ال قىزىلوردا، شىمكەنت، تاراز، قاينار ءبىرىنشى كاتەگوريالى جول بولعاندىقتان، بارلىق كولىك يەلەرى اقى تولەۋگە مىندەتتى.

 اقىسى تولەنگەن قىزمەتتىڭ ساپالى بولعانى ءلازىم. جۇرەتىن جولى ءۇشىن اقشا تولەيتىن جۇرگىزۋشىلەردىڭ پىكىرى وسىنداي. ال ەكونوميست رۇستەم جانسەيىتوۆ «اقىسىز جولدى دا ۇمىتپاۋ كەرەك»، - دەيدى.

رۇستەم جانسەيىتوۆ، ەكونوميست:

 - ءبىزدىڭ ەلدە تەگىن جول دەگەن تۇسىنىك نەگە جوق؟ بىردەن اقىلى جول دەپ جاتىرمىز. جاڭا جولداردى سالعاندا، ەسكىلەرىن دە كادەگە جاراتا بەرمەدىك پە؟ ونى جوندەۋدەن وتكىزسە، تەگىن بالامالى جول بولار ەدى. اقى تولەگىسى كەلمەيتىن جۇرگىزۋشىلەر دە بار شىعار. بۇل جەردە ولاردى تولەۋگە ماجبۇرلەپ جاتقانداي. ال مەملەكەت قوعامعا ءتيىمدى جاعداي جاساۋى كەرەك قوي.

 2025 -جىلعا دەيىن ەلىمىزدەگى اقىلى جولدار 12 مىڭ شاقىرىمعا جۋىقتايدى. جولداعى ساپا، قاۋىپسىزدىك، ءتارتىپ. مامانداردىڭ ايتۋىنشا، تولەنگەن اقشا دالاعا ۇشپايدى.

www.24.kz