ءتارتىبى ءۇشىن سىياقى الاتىن فۋتبولشى
شابۋىلشى وسىعان دەيىن «نيتستسا» كلۋبىندا ويناپ كەلگەن ەدى. ەندى ماۋسىم سوڭىنا دەيىن «مارسەلدە» وينايدى. ءوزىن تاماشا قىرىنان تانىتا بىلسە، كەلەر ماۋسىمدا دا وسى كوماندادا قالۋى مۇمكىن. كەي بەيرەسمي دەرەكتەر بويىنشا جاڭا كومانداسى فۋتبولشى ءۇشىن 4 ميلليون ەۋرو شىعىنداعان. 1,4 ميلليون ەۋرو كولەمىندە قوسىمشا سىياقىلار دا بار. سونداي- اق "سۋپەر ماريومەن" ارنايى كەلىسىمشارت تا جاسالعان. شابۋىلشى ماۋسىم سوڭىنا دەيىن 10 گول سوعاتىن بولسا، ەڭبەكاقىسىنان بولەك 600 مىڭ سىياقى الادى. ودان وزگە كلۋب ەتيكاسىن بۇزباي، ءتارتىپتى بولعانى ءۇشىن 800 مىڭ ەۋرو كولەمىندە سىياقى دا قاراستىرىلعان. ءتارتىپ بۇزعان جاعدايدا تولەنبەيدى.
ماريو بالوتەللي "ينتەر"، "مانچەستەر سيتي"، "ميلان"، "ليۆەرپۋل" مەن "نيتستسا" كلۋبتارى ساپىندا دوپ تەپتى. "ينتەرمەن" 3 رەت يتاليا چەمپيونى جانە چەمپيوندار ليگاسىنىڭ جەڭىمپازى بولدى. "مانچەستەر سيتيدە" ويناپ جۇرگەندە انگليا چەمپيونى اتاعىن جەڭىپ الدى. يتاليالىق ويىنشى ءتارتىپ بۇزۋىمەن تالايلاردىڭ تاڭداندىرعان. پورتۋگالدىق مامان جوزە موۋرينيۋ ماريو بالوتەلليدىڭ ومىرىنەن 200 بەتتەن تۇراتىن كۇلدىرگى اڭگىمەلەر (انەكدوت) تۇزۋگە بولادى، - دەيدى ءبىر سۇقباتىندا.
- ءبىز چەمپيوندار ليگاسىندا "رۋبينگە" قارسى ويناپ جاتقانبىز. "ينتەردەگى" بارلىق شابۋىلشىلارىم جاراقات العان. ديەگو ميليتو دا، سامۋەل ەتو'و- دا جوق. مەن ناعىز كەدەي ەدىم. 42 مينۋتتا ماريو سارى قاعاز الدى. ۇزىلىستە مەن ماريوعا: "سەن قازىر كومانداداعى جالعىز شابۋىلشىسىڭ. ابايلاپ وينا. ەشكىمگە تيىسپە، تەك دوپپەن وينا، ەگەر دوپتى جوعالتساڭ، قايتا الۋعا قاتتى تالپىنبا. تورەشى قاتەلەسىپ جاتسا، ۇندەمە، - دەدىم. ناتيجەسىندە ول 46 مينۋتتا الاڭنان قىزىل قاعاز الىپ شىعىپ كەتتى.. . ءيا، بۇل ءبىر عانا مىسال. ايتا بەرسەك جالعاسا بەرەدى.
2009 -جىلى "پالەرموعا" قارسى كەزدەسۋدە ماريو بالوتەللي ءوزىن تاماشا قىرىنان كورسەتەدى. سوعىلعان بەس گولدىڭ تورتەۋىنە سەپتىگىن تيگىزەدى. ەكەۋىن ءوز ەنشىسىنە جازادى. ءبىرىنشى بولىپ پەنالتي جاسايدى. ءبىراق، ونى شتاتتىق 11 مەترلىك ايىپ دوبىن تەبەتىن سامۋەل ەتو'و- عا بەرگىسى كەلمەي، ءوزى تەبۋگە ۇمتىلادى. كەيىننەن كوماندا كاپيتانى حاۆەر دزانەتتي اراعا تۇسكەن.
• "مانچەستەر سيتيدە" ويناپ جۇرگەندە جاتتىقتىرۋشىلارى وعان فۋتبولداعى فينتتەردى قاراسىن دەپ DVD ديسكىسىن بەرەدى. جارتى ساعاتتان كەيىن كەلگەن ولار ماريونىڭ اتىس- شابىس جانرىنداعى (بويەۆيك) فيلم كورىپ جاتقان جەرىنىڭ ۇستىنەن تۇسەدى.
• ماريو بىردە دوستارىمەن ۇيىندە وتشاشۋ جاساپ، سوڭى ورتكە ۇلاسقان. ءۇيىنىڭ پەردەسىنەن باستاپ جانا باستاعان وتتى دەر كەزىندە كەلگەن ءورت سوندىرۋشىلەر اۋىزدىقتاعان. ال فۋتبولشىنىڭ ءوزى بولسا، سول وقيعانىڭ الدىندا عانا پيروتەحنيكالىق زاتتاردى قولدانعاندا اباي بولۋدى ەسكەرتەتىن جارناماعا تۇسكەن ەكەن.
• "مانچەستەر ءسيتيدىڭ" اۆتوكولىك قوياتىن تۇراعىنىڭ ەسىگى اۆتوماتتى تۇردە اشىلىپ- جابىلاتىن اينەكتى ەسىك بولىپتى. بىردە ماريو سول ەسىكتەن كولىگىمەن كىرىپ- شىعىپ، بىرنەشە ساعات بويى ويناعان.
Massaget.kz