دونالد ترامپ ۆەنەسۋەلادا ءوزىن پرەزيدەنت دەپ جاريالاعان وپپوزيتسيا باسشىسىن قولدادى
ا ق ش پرەزيدەنتى دونالد ترامپ «ۆەنەسۋەلا حالقى نيكولاس مادۋرو رەجيمىنە باتىل قارسىلىق تانىتتى» دەپ مالىمدەپ، گۋايدوعا قولداۋ ءبىلدىردى.
«ۇلتتىق اسسامبلەيا جالعىز لەگيتيمدى مۇمكىندىگىن پايدالانىپ، ەل كونستيتۋتسياسىنان نيكولاس مادۋرونىڭ بيلىگىن زاڭسىز دەپ تانۋىن سۇرادى» دەلىنگەن اق ءۇي تاراتقان مالىمدەمەدە.
مەملەكەتتىك حاتشى مايك پومپەو نيكولاس مادۋرونى بيلىكتى ءوز ەركىمەن گۋايدوعا بەرۋگە شاقىردى.
23 - قاڭتاردا ۆەنەسۋەلادا حالىق پرەزيدەنت نيكولاس مادۋرونىڭ ەكىنشى مەرزىمگە پرەزيدەنت بولىپ سايلانۋىنا قارسىلىق تانىتىپ، جاپپاي كوشەگە شىقتى. نارازىلىق اكسيالارى ۆەنەسۋەلانىڭ بىرنەشە ءىرى قالاسىندا ءوتتى.
كەشە ۆەنەسۋەلا ۆيتسە- پرەزيدەنتى دەلسي رودريگەس نارازىلىق اكسيالارىن «ا ق ش بيلىگى جانە ەلدەگى وليگارحتار ۇيىمداستىرعانىن» مالىمدەدى.
«بۇگىن جەرگىلىكتى وليگارحتار امەريكا يمپەرياسىنان بۇيرىق الدى. ءبىراق ءبىز وتاندى قورعاۋعا شىقتىق» دەدى ۆيتسە- پرەزيدەنت مەملەكەتتىك تەلەارنا ارقىلى.
مادۋرو 2018 -جىلدىڭ سوڭىندا وتكەن سايلاۋدا فورمالدى تۇردە جەڭىسكە جەتىپ، 10 - قاڭتاردا رەسمي تۇردە قىزمەتىنە كىرىسكەن. ءبىراق مادۋرونىڭ جەڭىسىن باقىلاۋشىلار مەن وپپوزيتسيا مويىنداماي، سايلاۋدا زاڭ بۇزۋشىلىق كوپ بولعانىن مالىمدەگەن. مادۋرونىڭ ءوزى پارلامەنتتە ەمەس، ءوزىن قولداعان جوعارعى سوتتا انت بەردى. ۆەنەسۋەلا پارلامەنتى دەپۋتاتتارىنىڭ دەنى - وپپوزيتسيا جاقتاستارى.
22 - قاڭتاردا ا ق ش ۆيتسە- پرەزيدەنتى مايك پەنس نيكولاس مادۋرونى «ديكتاتور» دەپ اتاپ، يسپان تىلىندە ۆەنەسۋەلدىقتارعا «دەموكراتيا ورنامايىنشا، ءسوز بوستاندىعى قالپىنا كەلمەيىنشە، ءبىز سىزدەرمەن بىرگە بولامىز» دەپ مالىمدەمە جاساعان.
ال مادۋرو مەن ونىڭ جاقتاستارى وپپوزيتسيا ليدەرلەرىن «تەررورشىلار» دەپ اتاپ، ءوزىن جاقتايتىن حالىقتى دا كوشەگە شىعاراتىنىن مالىمدەدى.
www.azattyq.org