قاراعاندى وبلىسىندا ورتالىق ازياداعى ەڭ ءىرى ەلەكتر ستانتسياسى ىسكە قوسىلدى
ساران قالاسىندا ورتالىق ازياداعى ەڭ ءىرى دەپ تانىلعان كۇن ەلەكتر ستانتسياسى جۇمىس ىستەي باستادى. 164 گەكتار اۋداندا 307 مىڭ ۆولتايكالىق پانەلدەر ورنالاستىرىلعان. ولار كۇن ەنەرگياسىن ەلەكتر قۋاتىنا تۇرلەندىرەدى، دەپ حابارلايدى قاراعاندى وبلىسى اكىمدىگىنىڭ باسپا ءسوز قىزمەتى.
«ەلباسى ءبىزدىڭ الدىمىزعا 2030-جىلعا دەيىن بالاما ەنەرگيا ۇلەسىن %30 دەيىن ۇلعايتۋ تۋرالى مىندەت قويعان ەدى. ەندى مىنە بۇگىنگى تاڭدا سول ماقساتقا جەتۋ ءۇشىن ۇلكەن قادام جاساپ وتىرمىز. بۇگىن ىسكە قوسىلىپ وتىرعان كۇن ەلەكتر ستانتسياسى 100 مەگاۆاتت وندىرەدى. سىزدەر ونىڭ قۋاتتىلىعىن ءتۇسىنۋ ءۇشىن بۇل ەنەرگيا ساران سەكىلدى 10 قالانى قۋاتپەن قامتۋعا جەتەتىنىن ايتقىم كەلەدى. وبلىستا جالپى قۋاتتىلىعى 90 مەگاۆاتت بولاتىن تاعى وسىنداي 2 كۇن ەلەكتر ستانتسياسى سالىنىپ جاتىر»، دەدى ەرلان قوشانوۆ.
سارانداعى ەلەكتر ستانتسياسىندا ورناتىلعان پانەلدەر مەتالل قورشاۋى جوق كۇن باتارەياسىنىڭ سوڭعى بۋىنى. وسىنىڭ ارقاسىندا ولاردىڭ ۇستىنە قار جينالمايدى، ال جاڭبىر ولارعا ەش زيان كەلتىرمەستەن جەرگە اعىپ كەتەدى.
ايتا كەتۋ كەرەك، بۇلتتى كۇندەردىڭ وزىندە پانەلدەر 10-15 مەگاۆاتت قۋات وندىرەدى. پانەلدەردى پايدالانۋ مەرزىمى 40 جىل.
ك ە س ول تولىقتاي جەكەمەنشىك جوبا. ينۆەستورلار رەتىندە ەۋروپالىق كومپانيالار توبى شىعىپ وتىر. ولار جوباعا 137 ميلليون ا ق ش دوللارىن سالعان. پانەلدەردىڭ اناعۇرلىم ءتيىمدى جۇمىس ىستەۋى ءۇشىن ساراندا ارنايى تۇردە جاڭا قوسالقى ستانتسيا سالىندى جانە بارلىق ەلەكتر جەلىلەرى قالىپقا كەلتىرىلدى.
ستانتسيانىڭ ىسكە قوسىلۋ سالتاناتىنا قاتىسقان ق ر ەنەرگەتيكا ءمينيسترى قانات بوزىمبايەۆ ينۆەستورلاردى تەك كۇن ەنەرگياسىن شىعارۋ وندىرىسىنە عانا توقتالىپ قويماي، سونىمەن بىرگە جەل ەلەكتر ستانتسياسىن سالۋعا شاقىردى.
قاراعاندى وبلىسىنىڭ اكىمى ەرلان قوشانوۆ اتاپ وتكەندەي، وڭىرىمىزدە 1 تريلليون تەڭگەگە 33 ءىرى ينۆەستيتسيالىق جوبا جۇزەگە اسىرىلىپ جاتىر. 17 جوبا شەتەلدىك ينۆەستيتسيالاردىڭ قاتىسۋىمەن، جانە دە ولاردىڭ كەيبىرى قازاقستانمەن سەرىكتەسىپ قىزمەت ەتۋدى جالعاستىرعىسى كەلەتىندەرىن اتاپ وتكەن. وسىلايشا، مىسالى، ستانتسيانى اشقان كۇنى ەۋرووداق ينۆەستورلارى قاراعاندى وبلىسى اكىمدىگىمەن مەموراندۋمعا قول قويدى. بيزنەسمەندەر الداعى جىلدارى بالاما ەنەرگيا كوزدەرىن دامىتۋعا 500 ميلليون ا ق ش دوللارىن ينۆەستيتسيالاۋعا دايىن ەكەندەرىن جەتكىزدى.
«بۇل قاراجاتقا ءبىز «جاسىل» ەنەرگەتيكا سالاسىندا تاعى 3-4 ءىرى نىسانداردى سالۋدى جوسپارلاپ وتىرمىز. ءبىز ەۋروپالىق ارىپتەستەرىمىزگە ءبىرقاتار جوبالار ۇسىندىق، جانە جەرگىلىكتى بيلىكپەن جەمىستى ەڭبەك ەتەتىنىمىزگە سەنىمدىمىز، سەبەبى مۇندا ينۆەستورلار ءۇشىن بارلىق جاعداي جاسالعان»، - دەيدى «Sonnenergie» ا ق ينۆەستورلار توبىنىڭ وكىلى يان زوننەنشاين.
جاڭا كاسىپورىنداردى ىسكە قوسۋ، ينۆەستورلاردىڭ ايتۋىنشا، قاراعاندى وبلىسىندا جۇزدەگەن جاڭا جۇمىس ورىندارىن اشۋعا مۇمكىندىك بەرەدى.