زاتتاردى سىندىرۋ ارقىلى اشۋىن باساتىن ادامدارعا ارنايى بولمە اشىلدى

 استانا. قازاقپارات - قاتتى ىزالانعاندا ءبىر نارسەنى سىندىرىپ، اشۋ باسقىڭىز كەلە مە؟ قىتايدا ەرەكشە بولمە اشىلدى.

 وندا كەلگەن بەيجىڭدىكتەر تۇرمىستىق، كەڭسە تەحنيكاسىنان باستاپ، ىدىس- اياققا دەيىن قيراتادى. وسىلايشا ساباسىنا تۇسەدى ەكەن.

 بۇل جەر اسىرەسە سىركەسى سۋ كوتەرمەي، اشۋشاڭ بولىپ جۇرەتىندەرگە ارنالعان. الدىمەن دەنەنى جاۋىپ تۇراتىن ارنايى كيىم كيەسىز جانە بالعا نەمەسە شوقپار تاڭدايسىز. ءارى قاراي وڭدى سولدى ءبارىن قيراتىپ، بۋىڭدى شىعارىپ الۋعا بولادى. مۇندا كوبىنە كەڭسەدە جۇمىس ىستەيتىن نەمەسە وقۋدى جاڭا بىتىرگەن بىتىرگەن جاستار كەلەدى. ولار نەگىزىنەن كومپيۋتەردىڭ پەرنەتاقتاسىن، تەلەفون- فاكس، تەليەۆيزور تاڭداپ، ابدەن اشۋىن الادى ەكەن.

گۋي كەيۋي، بەيجىڭ تۇرعىنى:

 - قازىر بىزگە تۇسەتىن قىسىم كوپ. ۇنەمى قاربالاس نەمەسە ساباقتان مەزى بولاسىڭ. تاياۋدا عانا دوستارىمىزبەن وسى جەردى تاپتىق. وسى جەردە ايعايلاپ، بارلىعىن سىندىرىپ جەڭىلدەپ قالامىن.

 اشىلعانىنا ءتورت اي بولعانىنا قاراماستان، اشۋ باساتىن بولمە بەيجىڭدىكتەر اراسىندا بىردەن تانىلدى. مۇندا ايىنا 15 مىڭعا دەيىن اينەك قۇمىرانى سىندىرادى ەكەن. تۇرمىستىق تەحنيكانىڭ دا ءتۇر- ءتۇرى دە جەتىپ ارتىلادى.

 جيڭ مىڭ، كاسىپكەر:

- ءبىز جيناعان بۇل زاتتاردىڭ بارلىعى ەسكى ءارى بۇزىلعان. پايدالانۋعا كەلمەيدى. ءبىراق سوعان قاراماستان، سىرتى ءبۇتىن. ونى ەسكى زاتتار ساۋدالايتىن دۇكەندەردەن الامىز. مىنا مەنىڭ ارتىمداعى كەز كەلگەن تەحنيكانى الىپ سىندىرۋعا بولادى.

جيڭ مىڭ بۇل جەر زورلىق- زومبىلىققا شاقىرمايدى، كەرىسىنشە ادامداردى ساباسىنا ءتۇسىرىپ، اشۋىن باساتىنىنا سەنەدى. ونىڭ ۇستىنە بۇل ۇستانىم قورشاعان ورتانى قورعاۋ، ال تەحنيكانىڭ قالدىقتارى مەن اينەكتىڭ سىنىقتارىن قايتا ۋتيليزاتسياعا وتكىزەتىنىن ايتتى.

 اۆتورى: نۇربەك بەكەن

www.24.kz