جاستار جىلى جاستار اراسىنداعى جۇمىسسىزدىق ماسەلەسىن جويۋعا ىقپال ەتسە - ايجان ەرگەشوۆا
حالىقارالىق كومپانيادا مەنەجدەر- ماركەتولوگ بولىپ جۇمىس ىستەيتىن بويجەتكەن ەندىگى كەزەكتە جاستار اراسىنداعى جۇمىسسىزدىق ماسەلەسى شەشىلسە دەگەن تىلەگىن جەتكىزدى، دەپ حابارلايدى قازاقپارات ءتىلشىسى.
«مەنىڭ ويىمشا جاستار اراسىنداعى باستى ماسەلە - جۇمىسسىزدىق. قازىرگى نارىق زامانىندا حالىقارالىق كومپانيالار سيرەك. بۇل ورايدا جاستاردىڭ باسەكەگە قابىلەتتىلىگىن دامىتۋ ماڭىزدى. بيىلعى جىل جاستاردىڭ ەڭ وزەكتى ماسەلەسى - جۇمىسسىزدىقتى جويۋعا ىقپال ەتىپ، ناتيجەلى باعدارلامالار قابىلدانادى دەپ سەنەمىن. ال ءوز ۇسىنىسىم - قالانىڭ بەلسەندى جاستارىنىڭ باسىن قوسىپ، دوڭگەلەك ۇستەل ۇيىمداستىرۋ. ءار سالاداعى پروبلەمالاردى جاستاردىڭ وزدەرىنىڭ جەتكىزۋى وڭ ناتيجە بەرەدى»، - دەيدى جاس مامان.
ايجان ەرگەشوۆانىڭ ايتۋىنشا، جاستارعا ءوز ورتالارىندا دامۋدىڭ كەزەكتى ساتىسىنا وتۋىنە مۇمكىندىك جاساۋ قاجەت.
«ءوز باسىم شەت مەملەكەتتەردە ءجيى بولامىن. سالىستىرمالى تۇردە قاراساق، بىزدە مادەني شارالار وتە از. 2020-جىلى شىمكەنت ت م د مەملەكەتتەرىنىڭ مادەني استاناسى مارتەبەسىنە يە بولماق. بۇل ستاتۋس جاۋاپكەرشىلىكتى تاعى دا ارتتىرىپ وتىر. سوندىقتان، ءبىرىنشى كەزەكتە مادەني مەرەكەلەردى ءجيى وتكىزىپ جانە ءوز بەلسەندىلىگىمەن ءىس-شارا ۇيىمداستىرۋشىلارعا مەملەكەت تاراپىنان قولداۋدى كۇشەيتۋ ماڭىزدى. جاستار اراسىندا بەلسەندى وكىلدەر وتە كوپ. ءبىز سول تالانتتى جاستاردى ناسيحاتتاۋعا باسىمدىق بەرۋىمىز قاجەت. ياعني جاستار، ءوز زامانداستارىنان ۇلگى الىپ، العا ۇمتىلۋى كەرەك. بۇل ورايدا جاستارعا ءوز ساپىنداعى ۇزدىكتەردى وزدەرى انىقتاۋىنا مۇمكىندىك بەرۋ قاجەت»، - دەيدى مەنەجدەر-ماركەتولوگ.