قازاق رەسپۋبليكاسى اتاۋىن قايتا ەنگىزۋ كەرەك - ازات پەرۋاشەۆ
«اق جول» پارتياسىنىڭ ءتوراعاسى بۇگىنگى وتكەن ءماجىلىستىڭ پلەنارلىق وتىرىسىندا ۇكىمەت باسشىسىنىڭ اتىنا وسىنداي دەپۋتاتتىق ساۋال جولدادى، دەپ حابارلايدى قازاقپارات ءتىلشىسى «اق جول» پارتياسىنىڭ باسپا ءسوز قىزمەتىنە سىلتەمە جاساپ.
ساۋالدا دەپۋتات بۇل اتاۋدىڭ شىعۋ تاريحى تۋرالى اڭگىمەلەيدى.
«1920-جىلى تامىز ايىندا ماسكەۋدە سوۆناركوم شەكارا ماسەلەسىن جان الىسىپ تالقىلاعاندا، ءالىمحان ەرمەكوۆ بىرنەشە رەت بايانداما جاسادى. وسى جۇمىسقا احمەت بايتۇرسىن ۇلى، ءاليحان بوكەيحان جانە باسقا دا قازاق دەلەگاتسياسىنىڭ 12 مۇشەسى تىكەلەي قاتىستى. سوندا ولار ارنايى ەكسپەديتسيالاردا جيناستىرعان عىلىمي دەرەكتەرگە سۇيەنىپ، قازاق جەرىنىڭ تۇتاستىعىن دالەلدەپ شىقتى. ناتيجەسىندە، سول جىلى اۆتونومدى كەڭەستىك رەسپۋبليكا قۇرىلىپ، 1925-جىلدان باستاپ وعان حالقىمىزدىڭ ءتول «قازاق» دەگەن اتاۋى بەرىلدى. 2020-جىلى مەملەكەتتىلىك تۇرعىسىنان بولاشاق تاۋەلسىز قازاقستاننىڭ ىرگەتاسىنا اينالعان، ك س ر و قۇرامىنداعى قازاق رەسپۋبليكاسىنىڭ، ناقتىلاپ ايتقاندا قازاق رەسپۋبليكاسىنىڭ قۇرىلعانىنا 100 جىل تولادى. قازاقستان اتاۋىمەن قاتار رەسمي تۇردە قولدانىلۋى ءۇشىن - قازاق رەسپۋبليكاسى اتاۋىن قايتا ەنگىزۋ مۇمكىندىگىن قاراستىرۋدى ۇسىنامىز»، - دەپ مالىمدەدى پەرۋاشەۆ.
ەستەرىڭىزگە سالا كەتەيىك، مۇنداي باستامانى 5 جىل بۇرىن «ماڭگىلىك ەل» تۇجىرىمداماسىن تالقىلاۋ بارىسىندا ەلباسى نۇرسۇلتان نازاربايەۆتىڭ ءوزى كوتەرگەن بولاتىن.
«اق جول» فراكسياسىنىڭ جەتەكشىسى مەملەكەت باسشىسىنىڭ ۇستانىمىن ىسكە اسىراتىن ۋاقىت جەتكەنىن ايتتى.
«ءبىزدىڭ ويىمىزشا، ەلباسى ۇسىنىسىن ىسكە اسىراتىن كەز كەلدى. قارانى - قارا، اقتى - اق، قازاقتى - قازاق دەپ اتاۋىمىز كەرەك. ءتىپتى توتاليتارلىق سوۆەت وكىمەتى مويىنداعان قازاق اتىن رەسپۋبليكامىزعا قايتارۋ - تەك تاريحي ادىلەتتى قۇرمەتتەۋ عانا ەمەس، سونىمەن قاتار، بارشا كوپ ۇلتتى وتانداستارىمىزدىڭ بىرلىگى مەن ىنتىماعىن ودان ءارى نىعايتۋعا سەرپىن بەرەتىنىنە سەنىمدىمىز»، - دەدى ول.