قازاقتىڭ جەرى جۇماق قوي - نۇرسۇلتان نازاربايەۆ

استانا. قازاقپارات - ق ر پرەزيدەنتى نۇرسۇلتان نازاربايەۆ اۋىل شارۋاشىلىعىن دامىتۋدىڭ ماڭىزدىلىعىن جەتكىزدى، دەپ حابارلايدى قازاقپارات ءتىلشىسى.

«ءيا، تەرريتوريامىز كەڭ، سۋدىڭ تاپشىلىعى بار. دەگەنمەن، قازاقستاندا جەراستى سۋدىڭ قورى جەتكىلىكتى. ماسەلەن، بۇرىن بىزدە 1500 قۇدىق بولدى. سوندا ءاربىر قۇدىقتىڭ جانىندا 10 مىڭ باس مالدى وسىرۋگە بولادى. اناۋ يزرايلدى قاراڭىزشى، وسى ەلدىڭ بۇرىنعى پرەزيدەنتى، مارقۇم شيمون پەرەس ايتىپ وتىراتىن، 500 مىڭ ەۆرەيدى جيناپ الىپ، قۇمدى ءارى تاستاق جەرگە جىبەردىك دەپ. قازىر يزرايل بىزگە جىل ون ەكى اي قۇلپىنايدى جەتكىزىپ وتىرادى. سونىڭ ءبارىن ولار قۇمدى جەردە ءوسىردى. سۋلارى جوق بولسا دا، جەرورتا تەڭىزىنىڭ سۋىن اۋىز سۋعا اينالدىرۋدى ۇيرەندى. ءسويتىپ، وندىرىستەرىن كوتەرىپ الدى. وعان قاراعاندا، ءبىزدىڭ دالامىز جۇماق قوي»، - دەدى ن. نازاربايەۆ جاستار جىلىنىڭ سالتاناتتى اشىلۋ راسىمىندە.

پرەزيدەنتتىڭ ايتۋىنشا، ەلىمىزدە ەگىندىك جانە جايىلىم جەرلەرى جەتەرلىك. سونىڭ بارلىعىن ءتيىمدى پايدالانىپ، عىلىمي تەحنولوگيالاردى ەنگىزەتىن بولساق، الەم حالىقتارىن اسىراي الامىز. سودان مول تابىس تابۋعا مۇمكىندىك بار.

«سول سەبەپتى اگرارلىق كەشەن ءبىز ءۇشىن ماڭىزدى ماسەلەلەردىڭ ءبىرى ءارى بىرەگەيى بولىپ سانالادى. ءبىز وسى سالادا ءوز برەندتەرىمىزدى جاساي الامىز. اشىق ايتايىن، قازىر ءبىر ينۆەستورلار جەر سۇراپ وتىر. سوعان امەريكانىڭ تەحنولوگيالارىن ەنگىزۋگە ءازىر. ماسەلەن، ا ق ش- تىڭ داكوتا شتاتىندا بىزدەن جەتى ەسە ارتىق ءونىم الىپ وتىر. ونداي تەحنولوگيالاردى ءوز جەرىمىزدە دە ەنگىزە الامىز عوي. قازاقستاندا اگرارلىق كەشەن ستراتەگيالىق سالا بولىپ سانالادى. بولاشاقتا اتالعان سالا وتاندىق ەكونوميكانىڭ باستى درايۆەرىنە اينالۋى ابدەن مۇمكىن»، - دەپ اتاپ كورسەتتى ن. نازاربايەۆ.