تالانتتى جاستاردىڭ جولىن اشۋىمىز كەرەك - ەلباسى

استانا. قازاقپارات - تالانتتى جاستارىمىزدىڭ جولىن اشۋىمىز كەرەك. بۇل تۋرالى بۇگىن «تاۋەلسىزدىك ۇرپاقتارى» جاستار جىلىنىڭ اشىلۋىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

«بۇگىنگى الەمگە ايگىلى ءىرى كومپانيالاردىڭ نەگىزىن جاس كاسىپكەرلەر قالاعانىن بارلىعىڭىز بىلەسىزدەر. مىسالى فەيسبۋكتى مارك تسۋكەربەرگ 19 جاسىندا ويلاپ تاپتى. مايكراسوفتى بەيل گەيتس 20 جاسىندا، Aplle كومپانياسىن ستيۆ دجوبس 21 جاسىندا قۇردى. بىزدە دە 13 جاسىندا ق ب ت ۋ- دىڭ 2- كۋرسىن وقىپ جاتقان بالانى قازىر عانا تىڭدادىق. ولاردىڭ بارلىعى اسپاننان سالبىراپ تۇسكەن جوق. تالانت دەگەن دە بار، ونى جاسىرۋعا بولمايدى. ءبىراق ەينشتەين ايتقانداي، تالانتىڭ 90 پايىزى ەڭبەك»، - دەدى شارا بارىسىندا ەلباسى.

مەملەكەت باسشىسى ەكسپو نىساندارىنىڭ ءبىرى ستارتاپ-جوبالاردى ازىرلەۋمەن اينالىساتىن جاستارعا بەرىلگەنىن اتاپ ءوتتى.

«سول جەردە قازاقستاننىڭ 200 جاسى ءوز شارۋالارىن جاساپ جاتىر. مەن باياعىدا ارنايى ءبىر ۇلكەن عيمارات سالىپ، بىردەمە جاساپ، ونى ارى قاراي دامىتامىن دەگەن بالالاردىڭ بارلىعىنا مۇمكىنشىلىك جاساۋ كەرەك دەپ ويلاۋشى ەدىم. ولاردىڭ ويلاپ تاپقان جوبالارىن كوممەرتسياليزاتسيالاۋعا كومەكتەسۋ كەرەك. حالقىمىزدا «اقىل جاستان، اسىل تاستان» دەگەن ناقىل ءسوز بار. ءبىزدىڭ جاستارىمىزدا مۇنداي قاسيەت بار ەكەنىن كورىپ وتىرمىز. مىنا زالعا بارلىق تالانتتارىمىزدى جيناي المايمىز، سيمايمىز. ءبىراق بارلىق جاستارىمىزعا جول اشۋ ماڭىزدى»، - دەدى ق ر پرەزيدەنتى.

ايتا كەتەيىك، استانادا «تاۋەلسىزدىكتىڭ ۇرپاقتارى» اتاۋىمەن جاستار جىلىنىڭ اشىلۋ سالتاناتى ءوتىپ جاتىر.

شاراعا ۇكىمەت مۇشەلەرى، ق ر پارلامەنتى دەپۋتاتتارى، جەرگىلىكتى اتقارۋشى ورگان باسشىلارى، ق ر پرەزيدەنتى جانىنداعى جاستار ساياساتى كەڭەسىنىڭ مۇشەلەرى، «100 جاڭا ەسىم» بايقاۋىنىڭ جەڭىمپازدارى، «بولاشاق» باعدارلاماسىنىڭ تۇلەكتەرى، جاس عالىمدار قاتىسۋدا. سونىمەن قاتار بۇل جيىنعا شىعارماشىلىق، ستۋدەنتتىك جانە جۇمىسشى جاستار وكىلدەرى، جاس سپورتشىلار، دارىندى بالالار، زاماناۋي مەديا سالاسىنىڭ وكىلدەرى، بالالار ءۇيىنىڭ تاربيەلەنۋشىلەرى مەن تۇلەكتەرى، جاس اسكەري قىزمەتشىلەر كەلدى.

ەسكە سالا كەتسەك، ق ر پرەزيدەنتى نۇرسۇلتان نازاربايەۆ قازاقستان حالقىنا وتكەن جىلعى جولداۋىندا 2019-جىلدى جاستار جىلى دەپ جاريالاۋدى ۇسىنعان بولاتىن.

پرەزيدەنت ءوز سوزىندە جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەكتىگىن ايتقان بولاتىن ال، ارادا ءبىر ايدان استام ۋاقىت وتكەندە ەلباسى جارلىعىمەن 2019-جىل جاستار جىلى دەپ جاريالاندى.