ەلباسى: قازاقستاننىڭ ەڭ وراسان جەتىستىگى - قازاقستاندىقتاردىڭ جاڭا بۋىنى

استانا. قازاقپارات - قازاقستان پرەزيدەنتى نۇرسۇلتان نازاربايەۆ جاس بۋىندى جاستار جىلىنىڭ باستالۋىمەن قۇتتىقتادى، دەپ حابارلايدى قازاقپارات ءتىلشىسى.

«ءسوزدى توقتاتپاي ايتا بەرسىن دەگەن وي كەلەدى (جاستارعا قاراتا - اۆت). مەن ايتايىن دەگەن نەگىزگى ماسەلەنىڭ بارلىعىن ءار سالادا كوتەرىپ جاتىرسىڭدار. وسى 27 جىل تاۋەلسىزدىكتىڭ ىشىندە كوپ نارسە جاسادىق. كوپ جەڭىسكە جەتتىك. تاۋەلسىز قازاقستاندى ورناتىپ، ونداي مەملەكەتتى دۇنيەجۇزىنىڭ كارتاسىنا قويدىق. بۇل شەكارادا، بۇل اۋقىمدا ءدال وسىنداي جاعدايدا ەش ۋاقىتتا قازاقستان بولعان جوق. دۇنيەجۇزى بارلىعى پاش ەتكەن، مويىنداعان، قادىرلەگەن ەل بولا العانىمىز جوق. سوندىقتان، اتا-بابامىزدىڭ ارمانىن ورىنداپ، ءبىزدىڭ بۋىن تاۋەلسىزدىك ورناتتى. ءاربىر ادام ساياساتقا كەلگەندە، اسىرەسە ەل باسقارامىن دەگەن ءۇمىتى بولسا، ونىڭ حالىققا جولدايتىن ويى، جوسپارى بولۋى كەرەك. سول جوسپاردى ىسكە اسىرىپ، ناتيجەسىن كورگەن ساياساتكەر باقىتتى. ىستەپ جاتقان جۇمىستىڭ ءبارىن ايتا بەرۋگە بولادى. تاۋەلسىزدىگىمىزدى الدىق، ەكونوميكانى كوتەردىك، حالىقتىڭ ءال-اۋقاتىن ارتتىردىق، مادەنيەتىن، دەنساۋلىعىن كوتەردىك، استانانى سالدىق. ءبىراق، ىشىندەگى ەڭ نەگىزگى جەتىستىك - سەندەردى، جاس بۋىن قازاقستاندىقتاردى تاربيەلەپ شىقتىق»، - دەدى مەملەكەت باسشىسى استانادا ءوتىپ جاتقان «تاۋەلسىزدىكتىڭ ۇرپاقتارى» اتتى جاستار جىلىنىڭ اشىلۋ سالتاناتىندا.

پرەزيدەنت ءوز سوزىندە وسى جۇزەگە اسىرىلعان شارالاردىڭ ەڭ نەگىزگىسى - جاڭا بۋىن ەكەنىن اتاپ ءوتتى.

«مەن كورىپ وتىرعان قازاقستاندىقتاردىڭ جاڭا بۋىنى - قازاقستاننىڭ ەڭ وراسان جەتىستىگى، مەملەكەت باشسىسى رەتىندەگى مەنىڭ جۇمىسىمنىڭ ناتيجەسى. سىزدەرمەن كەزدەسىپ وتىرعانىم ءۇشىن وتە باقىتتىمىن. مەن قازاقستاندا جاستار جىلىنىڭ باستالۋىمەن قۇتتىقتايمىن»، - دەدى ەلباسى.

پرەزيدەنت بۇگىنگى تاڭدا ءومىردىڭ بارلىق سالاسى، ءبىلىم دە، جۇمىس تا، ءوزارا قارىم-قاتىناس تا وزگەرىپ كەلە جاتقانىن اتاپ ءوتتى.

«ءبىزدىڭ كوز الدىمىزدا جاڭا جاھاندىق وركەنيەت كەلە جاتىر. سيفرلىق قوعامنىڭ، ەكونوميكا مەن ءبىلىمنىڭ ءداۋىرى كەلدى. مەنىڭ بۋىنىم مەكتەپ وقىپ جۇرگەندە، اسىرەسە اۋىلدا تەلەديدار دا جوق ەدى. راديو ەندى عانا شىعا باستاعان ەدى. 100 جىل تاريح ءۇشىن تىم قىسقا ۋاقىت. قازىر ءبارىنىڭ 10 جىلدىڭ ىشىندە قالاي وزگەرىپ جاتقانىن كورە بەرىڭىز. سول ءۇشىن ءبىزدىڭ مەملەكەت ۋاقىت العا تارتىپ وتىرعان تەگەۋرىندەرگە جاۋاپ بەرە الۋى كەرەك»، - دەدى مەملەكەت باسشىسى.

ەلباسى ءوز سوزىندە سول سەبەپتى جاستار - باسەكەگە قابىلەتتىلىكتىڭ نەگىزگى فاكتورى ەكەنىن تىلگە تيەك ەتتى.

«اللاعا شۇكىر، ءبىز الەمنىڭ دامىعان ەلۋ ەلىنىڭ قاتارىنا ەندىك. ءبىراق، بۇل ءالى دە از. قازىرگى تاڭدا مەملەكەتتەر اراسىندا عانا ەمەس، ادامدار اراسىندا باسەكە قىزا ءتۇستى. كرەاتيۆتى بۋىنى بار مەملەكەت جەڭىمپاز بولىپ شىعادى. مەن بۇل جىگەردى سىزدەردەن كورىپ وتىرمىن»، - دەدى ەلباسى.

ايتا كەتسەك، جاستار جىلىنىڭ اشىلۋىنا ۇكىمەت مۇشەلەرى، ق ر پارلامەنتى دەپۋتاتتارى، جەرگىلىكتى اتقارۋشى ورگان باسشىلارى، قر پرەزيدەنتى جانىنداعى جاستار ساياساتى كەڭەسىنىڭ مۇشەلەرى، «100 جاڭا ەسىم» بايقاۋىنىڭ جەڭىمپازدارى، «بولاشاق» باعدارلاماسىنىڭ تۇلەكتەرى، جاس عالىمدار قاتىسۋدا. سونىمەن قاتار بۇل جيىنعا شىعارماشىلىق، ستۋدەنتتىك جانە جۇمىسشى جاستار، جاس سپورتشىلار، دارىندى بالالار، زاماناۋي مەديا سالاسىنىڭ وكىلدەرى، بالالار ءۇيىنىڭ تاربيەلەنۋشىلەرى مەن تۇلەكتەرى، جاس اسكەري قىزمەتشىلەر كەلگەن.

ەسكە سالا كەتسەك، ق ر پرەزيدەنتى نۇرسۇلتان نازاربايەۆ قازاقستان حالقىنا وتكەن جىلعى جولداۋىندا 2019-جىلدى جاستار جىلى دەپ جاريالاۋدى ۇسىنعان بولاتىن.

پرەزيدەنت ءوز سوزىندە جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەكتىگىن ايتقان بولاتىن. ال، ارادا ءبىر ايدان استام ۋاقىت وتكەندە ەلباسى جارلىعىمەن 2019-جىل جاستار جىلى دەپ جاريالاندى.