سەمەيلىك اقىن پرەزيدەنتتەن ادەبيەت اكادەمياسىن اشۋعا قولداۋ ءبىلدىرۋدى سۇرادى
«قازاقتىڭ جاس اقىن-جازۋشىلارى مەملەكەت قولداۋىنان كەندە ەمەسپىز. قازاقستاننىڭ جاس اقىن-جازۋشىلارى ۇلتىمىزدىڭ رۋحانياتىنا، ادەبيەتىمىزدىڭ دامۋىنا ۇلەس قوسىپ ءجۇر. مىسالى، مەن وتكەن جىلى ءوزىڭىزدىڭ قولداۋىڭىزبەن قازاقستان جازۋشىلارى قولعا العان جالپى رەسپۋبليكالىق ادەبي ولكەتانۋ جوباسىنا قاتىستىم. ارنايى كەرەكۋ جەرىنە بارىپ، سول جەردىڭ ادەبيەتىمەن، مادەنيەتىمەن تانىسىپ، ءبىر توپ شىعارما جازدىم. تەك قانا مەن ەمەس، رەسپۋبليكامىزدىڭ ءار ايماعىنداعى اعا بۋىن اقىن-جازۋشىلار، جاس قالامگەرلەر وسى جوباعا قاتىستى. ەلىمىز تۋرالى، جەرىمىز تۋرالى شىعارمالار دۇنيەگە كەلدى. وسىنداي مۇمكىندىك بەرگەن سىزگە بارلىق قالامگەرلەردىڭ اتىنان العىسىمدى بىلدىرەم»، - دەدى مەرەي قارت پرەزيدەنتتىڭ قاتىسۋىمەن ءوتىپ جاتقان «تاۋەلسىزدىك ۇرپاقتارى» اتتى جاستار جىلىنىڭ اشىلۋ سالتاناتىندا.
اقىن ءوز سوزىندە قازاقستان جازۋشىلار وداعى ۇسىنعان بىرەگەي جوبا جايلى ايتىپ ءوتتى.
«ءوزىڭىز ۇنەمى ايتىپ جۇرگەندەي، باسەكەگە قابىلەتتى جاستار - ەلدىڭ بولاشاعى. ەندەشە، ادەبيەت الەمىندە دە ءبىز باسەكەگە قابىلەتتى بولۋىمىز ءۇشىن جاس قالامگەرلەرگە ارنالعان ادەبيەت اكادەمياسىن قۇرۋ تۋرالى ۇسىنىسىمدى قاراستىرساڭىز دەپ ءوتىنىش ايتقىم كەلەدى. ادەبيەت اكادەمياسى اشىلاتىن بولسا، جاستار بىلىمگە ۇمتىلىپ، الپاۋىت مەملەكەتتەردىڭ تىلدەرىن مەڭگەرىپ، فيلوسوفتاردىڭ، مادەنيەتتانۋشىلاردىڭ ءبىلىمىن بويىنا سىڭىرسە، ادەبيەتىمىزدىڭ الەۋەتى ارتىپ، تىنىسى، كەڭىستىگى اشىلار ەدى. سوندا جاس قالامگەرلەر جاھاندىق باسەكەگە قابىلەتتى شىعارمالاردى دۇنيەگە اكەلەر ەدى»، - دەدى ول.
مەرەي قارت ءوز سوزىندە ەلباسىنىڭ «رۋحاني جاڭعىرۋ» جانە «ۇلى دالانىڭ جەتى قىرى» ماقالالارى ءار قازاقتىڭ جۇرەگىنەن ورىن العانىن ايتا كەلە، العان اسەرىن ولەڭ جولدارىمەن جەتكىزدى.
ايتا كەتسەك، جاستار جىلىنىڭ اشىلۋىنا ۇكىمەت مۇشەلەرى، ق ر پارلامەنتى دەپۋتاتتارى، جەرگىلىكتى اتقارۋشى ورگان باسشىلارى، ق ر پرەزيدەنتى جانىنداعى جاستار ساياساتى كەڭەسىنىڭ مۇشەلەرى، «100 جاڭا ەسىم» بايقاۋىنىڭ جەڭىمپازدارى، «بولاشاق» باعدارلاماسىنىڭ تۇلەكتەرى، جاس عالىمدار قاتىسۋدا. سونىمەن قاتار بۇل جيىنعا شىعارماشىلىق، ستۋدەنتتىك جانە جۇمىسشى جاستار وكىلدەرى، جاس سپورتشىلار، دارىندى بالالار، زاماناۋي مەديا سالاسىنىڭ وكىلدەرى، بالالار ءۇيىنىڭ تاربيەلەنۋشىلەرى مەن تۇلەكتەرى، جاس اسكەري قىزمەتشىلەر كەلگەن.
ەسكە سالا كەتسەك، ق ر پرەزيدەنتى نۇرسۇلتان نازاربايەۆ قازاقستان حالقىنا وتكەن جىلعى جولداۋىندا 2019-جىلدى جاستار جىلى دەپ جاريالاۋدى ۇسىنعان بولاتىن. پرەزيدەنت ءوز سوزىندە جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەكتىگىن ايتتى. ال، ارادا ءبىر ايدان استام ۋاقىت وتكەندە ەلباسى جارلىعىمەن 2019-جىل جاستار جىلى دەپ جاريالاندى.