قازاقستان جاستارى پرەزيدەنت باستاماسىن قولداۋ ماقساتىندا جاڭا اكسيا باستادى

استانا. قازاقپارات - قازاقستاننىڭ بارشا جاستارى پرەزيدەنت باستامالارىنا قولداۋ كورسەتۋى قاجەت. بۇل پىكىردى قازاقستان حالقى اسسامبلەياسى «جاڭعىرۋ جولى» رەسپۋبليكالىق جاستار قوزعالىسىنىڭ ءتوراعاسى ماكسيم سپوتكاي ءبىلدىردى.

قازاقستاندا جاستار جىلىنىڭ اشىلۋىنا وراي، «جاڭعىرۋ جولى» رەسپۋبليكالىق جاستار قوزعالىسى الەۋمەتتىك جەلىلەردەگى اۆاتارعا ارنايى فرەيم ورناتۋ اكتسياسىن باستادى. بۇگىن، ياعني 23- قاڭتاردان باستاپ، بۇل فرەيمدەردى اكتسياعا قوسىلۋدى قالايتىن كەز كەلگەن ازامات «قازاقپارات» ح ا ا قوسىمشا سايت-ساتتەليتىنەن jastar.inform.kz جۇكتەي الادى.

«بۇگىن مەملەكەت باسشىسى قازاقستان جاستارى جىلىن رەسمي تۇردە اشتى. ءبىزدىڭ اكتسيا پرەزيدەنت ۇسىنىستارىن قولداۋعا باعىتتالعان. جاستار جىلى - بۇل قازاقستان تاريحىندا ۇلت كوشباسشىسى تاراپىنان، مەملەكەت تاراپىنان جاستاردى قولداۋعا جاسالعان تەڭدەسسىز قادام. سوندىقتان، ءبىز، جاستار، فورۋمدا كوتەرىلگەن ۇسىنىستاردى تولىق قولداۋىمىز كەرەك. بۇگىندە جاستاردىڭ بارلىعى دەرلىك الەۋمەتتىك جەلىدە وتىرادى. سول سەبەپتى، الەۋمەتتىك جەلىلەردە فلەشموب جۇرگىزۋدى ۇيعاردىق. بۇل - جاس كوشباسشىلار مەن جاستاردىڭ پرەزيدەنت باستامالارىن قولداۋعا ارنالعان جاڭا قوزعالىسى. بۇگىنگى اكتسيانى پرەزيدەنتتىڭ 27 جىل بويى جۇرگىزگەن ساياساتىن جاستاردىڭ قولداۋى دەپ تە تۇسىنگەن ءجون. سوندىقتان، مەن قازاقستان جاستارىن مەملەكەت باسشىسىنىڭ ساياساتىنا، تاۋەلسىزدىك جىلدارى قول جەتكىزگەن تابىستارىمىزعا قولداۋ بىلدىرۋگە شاقىرامىن»، - دەدى م. سپوتكاي.

ەسكە سالا كەتسەك، بۇگىن ەكسپو-2017 كورمە كەشەنىندەگى «نۇر الەم» پاۆيلونىندا «تاۋەلسىزدىك ۇرپاقتارى» تاقىرىبىندا جاستار جىلىنىڭ اشىلۋ سالتاناتى ءوتتى.

ءىس-شاراعا مەملەكەت باسشىسى، ۇكىمەت مۇشەلەرى، ق ر پارلامەنتى دەپۋتاتتارى، جەرگىلىكتى اتقارۋشى ورگاندار باسشىلارى، ق ر پرەزيدەنتى جانىنداعى جاستار ساياساتى كەڭەسىنىڭ مۇشەلەرى، «100 جاڭا ەسىم» بايقاۋىنىڭ جەڭىمپازدارى، «بولاشاق» باعدارلاماسىنىڭ تۇلەكتەرى، جاس عالىمدار، شىعارماشىلىق، ستۋدەنتتىك جانە جۇمىسشى جاستار وكىلدەرى، جاس سپورتشىلار، دارىندى بالالار، زاماناۋي مەديا سالاسىنىڭ وكىلدەرى، بالالار ءۇيىنىڭ تاربيەلەنۋشىلەرى مەن تۇلەكتەرى، جاس اسكەري قىزمەتشىلەر جانە ت. ب. قاتىستى.

وسىلايشا، ەلىمىزدە مەملەكەتتىك جاستار ساياساتىن جان-جاقتى قولداۋ مەن جۇزەگە اسىرۋعا باعىتتالعان اۋقىمدى ءىس-قيمىل جوسپارىن ىسكە اسىرۋ باستاۋ الادى.

ءىس-شارا بارىسىندا جاستار جۇزەگە اسىرعان تابىستى جوبالار مەن جاڭا ونىمدەر تانىستىرىلدى. سپيكەر رەتىندە ءار ءتۇرلى سالالاردا جەتىستىككە جەتكەن جاس قازاقستاندىقتار بايانداما جاسايدى. ماسەلەن، تانىمال كاسىپكەرلەر، ستارتاپشىلار، ەرىكتىلەر، اۋىل شارۋاشىلىعى، عىلىم جانە ادەبيەت سالاسىنداعى ماماندار ءسوز سويلەدى.

ەسكە سالا كەتسەك، قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ جارلىعىمەن 2019-جىل جاستار جىلى دەپ جاريالاندى.