بۇركىتشى قىز ايشولپان پرەزيدەنتكە الىستاعى اعايىننىڭ سالەمىن جەتكىزدى

None
None
استانا. قازاقپارات - بۇگىن جاستار جىلىنىڭ سالتاناتتى اشىلۋ راسىمىندە بۇركىتشى قىز ايشولپان نۇرعايىم قىزى مەملەكەت باسشىسى نۇرسۇلتان نازاربايەۆتىڭ الدىندا ءسوز سويلەدى، دەپ حابارلايدى قازاقپارات ءتىلشىسى.

«مەن سىزبەن كەزدەسۋدى ارمانداعان ەدىم. مىنە، بۇگىن - سول ارمانىم ورىندالعان كۇن. شىنىمدى ايتسام، ءسال قوبالجىپ تۇرمىن. سەبەبى كۇندە پرەزيدەنتپەن كەزدەسە بەرمەيمىن عوي. مەن موڭعوليانىڭ بايان-ولگەي ايماعىندا تۋىپ ءوستىم. ءبىراق تا اتاماكەنىم قازاقستان ەكەنىن ەش ۋاقىتتا ۇمىتپادىم. سونىڭ ارقاسى شىعار، قازىرگى كەزدە مەن «نۇر وردا» حالىقارالىق مەكتەبىندە وقىپ جاتىرمىن»، - دەدى ا. نۇرعايىپ قىزى.

ايشولپان ءوزى تۇسكەن فيلم تۋرالى ايتا كەلە، بۇركىت باپتاۋدىڭ قىر-سىرىن دا جەتكىزدى. ونىڭ ايتۋىنشا، بۇركىت باپتاۋ ءۇشىن قايسارلىق قاجەت. اسىرەسە، بۇركىتتىڭ بالاپانىن الۋ اسا قيىن بولادى. ايشولپان وسى بۇركىتتى ءوسىرىپ، بۇركىتشىلەر سايىسىندا جەڭىمپاز اتاندى. ءتىپتى، بۇركىتتى 5 سەكۋندتا قولعا قوندىرىپ، رەكوردت جاڭارتتى. وسى ورايدا بۇركىتشى قىز استانادا جانە باسقا دا ايماقتاردا بۇركىتشىلەر مەكتەپتەرىن اشۋدى ۇسىندى.

«ايتپاقشى، اتا، ۇمىتپاي تۇرعاندا ايتا كەتسەم، التايداعى از قازاقتىڭ اماناتى بار ەدى. ءسىزدى بايان-ولگەيگە قوناق بولۋعا شاقىرامىز. اق داستارقاننان ءدام تاتىپ كەتسەڭىز، الىستاعى اعايىننىڭ رۋحى ءبىر جاساپ قالادى»، - دەپ اتاپ كورسەتتى ا. نۇرعايىپ قىزى.

ايتا كەتەيىك، ەلورداداعى «نۇر الەم» پاۆيلونىندا ەلباسى نۇرسۇلتان نازاربايەۆتىڭ قاتىسۋىمەن «تاۋەلسىزدىك ۇرپاقتارى» اتتى جاستار جىلىنىڭ سالتاناتتى اشىلۋ ءراسىمى ءوتىپ جاتىر.

ق ر پرەزيدەنتى نۇرسۇلتان نازاربايەۆ قازاقستان حالقىنا وتكەن جىلعى جولداۋىندا 2019-جىلدى جاستار جىلى دەپ جاريالاۋدى ۇسىنعان بولاتىن. پرەزيدەنت ءوز سوزىندە جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەكتىگىن ايتقان ەدى. ال، ارادا ءبىر ايدان استام ۋاقىت وتكەندە ەلباسى جارلىعىمەن 2019-جىل جاستار جىلى دەپ جاريالاندى.

سوڭعى جاڭالىقتار