اتىراۋلىق جاس كاسىپكەر استانادا الما باعىن سالاتىن بولدى - جاستار جىلى
الما باعىن سالۋ ءۇشىن جاس كاسىپكەر پرەزيدەنتتەن ەلوردادا ارنايى ورىن بەلگىلەپ بەرۋدى سۇراعان بولاتىن، دەپ حابارلايدى قازاقپارات ءتىلشىسى.
استانا قالاسىندا «تاۋەلسىزدىك ۇرپاقتارى» اتاۋىمەن ءوتىپ جاتقان جاستار جىلىنىڭ اشىلۋ سالتاناتىندا كاسىپكەر، «نۇر وتان» پارتياسى مەن ق ح ا مۇشەسى تاميلا روزمەتوۆا ءوزىنىڭ كاسىبى تۋرالى ايتىپ بەردى.
«جاستار جىلى - ءبىز ءۇشىن ۇلكەن مۇمكىندىك. مەنىڭ جاسىم 27 دە. فەرمەرمىن. «سارايشىق» فەرماسىن باسقارىپ وتىرعانىما 5 جىل بولدى. بۇل - ءالپى ەشكىلەرىنىڭ ءسۇتىن وڭدەيتىن كاسىپورىن. ءبىزدىڭ فەرمادا مىڭعا تارتا ەشكى بار. ءسۇت ءونىمىنىڭ 15 ءتۇرىن شىعارامىز. مەنىڭ حوببيىم - ىرىمشىك ءوندىرۋ. مەن ىرىمشىكتىڭ بىرنەشە ءتۇرىن جاساپ كەلەمىن. ولاردىڭ ءبىرىن ءوزىمنىڭ تۋعان جەرىمنىڭ قۇرمەتىنە «اتىراۋ ىرىمشىگى» دەپ اتادىم. بۇل وتە پايدالى ءارى 100 پايىز ساپالى ءونىم. ءبىزدىڭ ۇجىمدا 80 گە تارتا قىزمەتكەر بار. ولاردىڭ 94 پايىزىنىڭ جاسى 36 عا دەيىنگى جاستار. جاس بولعاندىقتان، ارمان-تىلەكتەرىمىز مول»، - دەيدى تاميلا روزمەتوۆا.
جاس كاسىپكەر «اۋىل - ەل بەسىگى» جوباسى تۋرالى ايتا كەلە بۇل باستاما جاستار ءۇشىن ايتارلىقتاي الەۋمەتتىك ليفت بولا الاتىنىن اتاپ ءوتتى.
«قازاقستان - المانىڭ تاريحي وتانى ەكەنىن مەن ءسىزدىڭ ماقالاڭىزدان وقىپ ءبىلدىم. ءبىز قازىرگى تاڭدا ماحامبەت الماسىن قايتا جاڭعىرتۋدى قولعا الدىق. جاستار جىلى ق ح ا جانىنداعى «جاڭعىرۋ جولى» جاستار قوزعالىسى ناقتى جوبالارعا قولداۋ بىلدىرگىمىز كەلەدى. وسى كوكتەمدە استانادا الما باعىن سالۋدى جوسپارلاپ وتىرمىز. ءبىز قازىردىڭ وزىندە وسى باق ءۇشىن المانىڭ سۋىققا دا، جەلگە دە شىدامدى 400 سورتىن دايىنداپ قويدىق. سونىمەن بىرگە، الما باعىن تولىعىمەن تامشىلاتىپ سۋارۋ جۇيەسىنە قوسامىز. سىزدەن ەلوردادا الما باعىنا ورىن بەلگىلەپ بەرۋىڭىزدى سۇرايمىن»، - دەدى جاس كاسىپكەر.
وسىعان وراي مەملەكەت باسشىسى الما باعىنا ارنايى ورىن ءبولۋدى استانا قالاسىنىڭ اكىمى باقىت سۇلتانوۆقا تاپسىردى.
ايتا كەتسەك، جاستار جىلىنىڭ اشىلۋىنا ۇكىمەت مۇشەلەرى، ق ر پارلامەنتى دەپۋتاتتارى، جەرگىلىكتى اتقارۋشى ورگان باسشىلارى، قر پرەزيدەنتى جانىنداعى جاستار ساياساتى كەڭەسىنىڭ مۇشەلەرى، «100 جاڭا ەسىم» بايقاۋىنىڭ جەڭىمپازدارى، «بولاشاق» باعدارلاماسىنىڭ تۇلەكتەرى، جاس عالىمدار قاتىسۋدا. سونىمەن قاتار بۇل جيىنعا شىعارماشىلىق، ستۋدەنتتىك جانە جۇمىسشى جاستار وكىلدەرى، جاس سپورتشىلار، دارىندى بالالار، زاماناۋي مەديا سالاسىنىڭ وكىلدەرى، بالالار ءۇيىنىڭ تاربيەلەنۋشىلەرى مەن تۇلەكتەرى، جاس اسكەري قىزمەتشىلەر كەلگەن.
ەسكە سالا كەتسەك، ق ر پرەزيدەنتى نۇرسۇلتان نازاربايەۆ قازاقستان حالقىنا بيىلعى جولداۋىندا 2019-جىلدى جاستار جىلى دەپ جاريالاۋدى ۇسىنعان بولاتىن.
پرەزيدەنت ءوز سوزىندە جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەكتىگىن ايتقان بولاتىن ال، ارادا ءبىر ايدان استام ۋاقىت وتكەندە ەلباسى جارلىعىمەن 2019-جىل جاستار جىلى دەپ جاريالاندى.