ەلباسىنىڭ قاتىسۋىمەن جاستار جىلىنىڭ اشىلۋ سالتاناتى باستالدى

استانا. قازاقپارات - بۇگىن ەلورداداعى «نۇر الەم» پاۆيلونىندا ەلباسى نۇرسۇلتان نازاربايەۆتىڭ قاتىسۋىمەن «تاۋەلسىزدىك ۇرپاقتارى» اتتى جاستار جىلىنىڭ سالتاناتتى اشىلۋ ءراسىمى باستالدى، دەپ حابارلايدى قازاقپارات ءتىلشىسى.

شارا باستالار الدىندا «جاس قازاقستاندىقتاردىڭ جوبالارى» كورمەسىندە قازاقستان پرەزيدەنتىنە دارىندى جاستارىمىزدىڭ NNaimi.kz «Shoqan suits» , «Qazaq eli», «Beyond», «Kusto Group»  سەكىلدى تابىستى جوبالارى تانىستىرىلدى.

سالتاناتتى راسىمدە مەملەكەت باسشىسى جاستار جىلىنىڭ ماڭىزدىلىعى تۋرالى ءسوز سويلەيدى دەپ كۇتىلۋدە. سونىمەن قاتار ق ر قوعامدىق دامۋ ءمينيسترى دارحان كالەتايەۆتىڭ ەلىمىزدەگى مەملەكەتتىك جاستار ساياساتىنىڭ نەگىزگى باعىتتارى مەن جەتىستىكتەرى تۋرالى بايانداماسى جوسپارلانعان.

مۇنان بولەك سپيكەرلەر رەتىندە ءارتۇرلى سالادا جەتىستىككە جەتكەن جاستاردىڭ بەلسەندى جانە كرەاتيۆتى وكىلدەرى، ونىڭ ىشىندە جاس كاسىپكەر راسۋل ابدۋللايەۆ، جاس عالىم ءارى ستارتاپەر يۆان كرەپاك، ەرىكتىلەر وكىلى ايسۇلۋ ەرنيازوۆا، اگرارلىق سالا وكىلى تاميلا روزمەتوۆا ءسوز سويلەمەك.

جاستار جىلىنىڭ اشىلۋىنا ۇكىمەت مۇشەلەرى، ق ر پارلامەنتى دەپۋتاتتارى، جەرگىلىكتى اتقارۋشى ورگان باسشىلارى، ق ر پرەزيدەنتى جانىنداعى جاستار ساياساتى كەڭەسىنىڭ مۇشەلەرى، «100 جاڭا ەسىم» بايقاۋىنىڭ جەڭىمپازدارى، «بولاشاق» باعدارلاماسىنىڭ تۇلەكتەرى، جاس عالىمدار قاتىسۋدا. سونىمەن قاتار بۇل جيىنعا شىعارماشىلىق، ستۋدەنتتىك جانە جۇمىسشى جاستاردىڭ وكىلدەرى، جاس سپورتشىلار، دارىندى بالالار، زاماناۋي مەديا سالاسىنىڭ وكىلدەرى، بالالار ءۇيىنىڭ تاربيەلەنۋشىلەرى مەن تۇلەكتەرى، جاس اسكەري قىزمەتشىلەر كەلگەن.

ەسكە سالا كەتسەك، ق ر پرەزيدەنتى نۇرسۇلتان نازاربايەۆ قازاقستان حالقىنا بيىلعى جولداۋىندا 2019-جىلدى جاستار جىلى دەپ جاريالاۋدى ۇسىنعان بولاتىن.

پرەزيدەنت ءوز سوزىندە جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەكتىگىن ايتقان ەدى. ال، ارادا ءبىر ايدان استام ۋاقىت وتكەندە ەلباسى جارلىعىمەن 2019-جىل جاستار جىلى دەپ جاريالاندى.