قازاقستاندىقتاردىڭ يپوتەكا بويىنشا قارىزى كەشىرىلۋى مۇمكىن
بۇل تۋرالى قوعامدىق بىرلەستىك وكىلدەرى ايتىپ وتىر. اتالعان ماسەلە ۇلتتىق بانكتە جۇمىسشىلار توبىنىڭ وتىرىسىندا تالقىلاندى.
بۇل تۋرالى «استانا» ارناسى حابارلايدى.
«ەل بىرلىگى» قوعامدىق بىرلەستىگىنىڭ مالىمەتىنشە، الەۋمەتتىك تۇرعىدا از قامتىلعان قازاقستاندىقتاردىڭ يپوتەكا بويىنشا قارىزى كەشىرىلۋى ىقتيمال. ۇلتتىق بانكتەگىلەر بۇل ۇسىنىستىڭ بۇگىندە قارالىپ جاتقانىن عانا راستادى. الايدا پىكىر بىلدىرۋگە ءالى ەرتە دەيدى.
مۇنداي ۇسىنىستاردىڭ ءبىرى - 1 جانە 2-توپتاعى مۇگەدەكتەردى، ۇلى وتان سوعىسىنىڭ ارداگەرلەرى مەن ولارعا تەڭەستىرىلگەن تۇلعالاردى، مۇگەدەك بالالاردى جانە قايتىس بولعان اتا-اناسىنان يپوتەكا قارىزى قالعان كامەلەتكە تولماعان بالالاردى تاربيەلەپ وتىرعان وتباسىلاردى يپوتەكا قارىزىنان بوساتۋ.
«ەل بىرلىگى» قوعامدىق بىرلەستىگىنىڭ ءتورايىمى شولپان ريزابەكوۆا ۇلتتىق بانك جانىندا، جۇمىسشىلار توبىنىڭ وتىرىسىنا قاتىسقان.
«جالپى وزدەرىنىڭ تولەي المايتىنداي جاعدايداعى 1, 2-توپ مۇگەدەكتەرى، تولىق وتباسى ەمەستەر، سوعىس ارداگەرلەرى، زەينەتكەرلەردىڭ ماسەلەسىن شەشۋى كەرەك. ارينە، ول شەشىلەتىن شارۋا. ەكىنشىدەن مۇنى ۇلتتىق بانك وتە جاقسى قابىلدادى. بۇل دۇرىس دەپ وتىر. سەبەبى، ول حالىققا وتە ءتيىمدى»، - دەيدى شولپان ريزابەكوۆا.