تانىمال ءانشى ساحنادا ءان شىرقاپ تۇرىپ قايتىس بولىپ كەتتى

 استانا. قازاقپارات - تاتاردىڭ تانىمال ءانشىسى ءارى ۆوكال بويىنشا پەداگوگى فانيا حاليۋللوۆا ديميتروۆگرادتا مادەنيەت ءۇيىنىڭ ساحناسىندا ونەر كورسەتكەن ساتىندە قايتىس بولىپ كەتتى.

بۇل تۋرالى «ديمگراد 24» باسىلىمىنا سىلتەمە جاساپ Stan.kz حابارلايدى.

قايعىلى جاعداي 20- قاڭتاردىڭ كەشىندە ورىن العان.

«كارلىگاچ» جانە «نەۋگاسيمىە زۆەزدى» مۋزىكالىق انسامبلدەرىنىڭ باسقارۋشىسى ساحنادا تۇرعان كەزىندە كەنەتتەن جاعدايى ناشارلاپ كەتكەن. 53 جاستاعى ءانشى اياق استىنان ەسىنەن تانىپ، قۇلاپ قالدى. جەدەل جاردەم بريگاداسى ايەلدى اۋرۋحاناعا جەتكىزگەنىمەن، وكىنىشكە وراي، ونى قۇتقارۋ مۇمكىن بولمادى. الدىن الا نۇسقا بويىنشا، ول جۇرەگى توقتاپ قالىپ قايتىس بولعان.

زالدا بولعان كورەرمەندەردىڭ ءبىرى ءارتىستىڭ جاعدايى ناشارلاعان ءساتتى ۆيدەوعا ءتۇسىرىپ العان.

ديميتروۆگرادتا فانيا حاليۋللوۆانى دارىندى ءانشى، تاماشا پەداگوگ رەتىندە بىلگەن. ول تاتاردىڭ ۇلتتىق مەيرامدارىندا ۇنەمى جۇرگىزۋشى بولىپ كەلگەن. سونداي-اق، ءارتىس قانشاما جاس دارىندى تاربيەلەپ شىعاردى.

«ونىڭ وقۋشىلارىمەن ديميتروۆگراد قانا ەمەس، تاتارستان رەسپۋبليكاسى دا ماقتانادى»، - دەلىنگەن باسىلىمدا.