فۋتبولدان سۋپەركۋبوك ويىنى الماتىدا وتكىزىلەدى
قازاقستان كاسىپقوي فۋتبول ليگاسىنىڭ حابارلاۋىنشا، اتالمىش كەزدەسۋدى استانا جانە الماتى قالالارىندا وتكىزۋگە ۇسىنىس تۇسكەن ەدى. ناتيجەسىندە بۇل ويىندى ماماندار وڭتۇستىك استاناداعى ورتالىق ستاديوندا وتكىزۋگە شەشىم قابىلدادى.
اتالمىش سۋپەركۋبوك ويىنى ەل فۋتبولىنىڭ تاريحىندا 12 مارتە وتكىزىلەدى. العاش رەت ول 1995-جىلى ساراپقا سالىندى. سول جولى سەمەيدىڭ «ەلىماي» كومانداسى الماتى قالاسىندا وسكەمەننىڭ «ۆوستوگىن» 2:0 ەسەبىمەن جەڭىپ، كۋبوكتى ەنشىلەدى. ودان كەيىن ارادا ءبىرشاما جىل ءۇزىلىس ورىن الىپ، سۋپەركۋبوك ويىنى 2008-جىلى وتكىزىلدى. ول جولى قوستانايدىڭ «توبىلى» «اقتوبەنى» 2:0 ەسەبىمەن تىزە بۇكتىردى. كەلەسى سۋپەركۋبوك 2010-جىلى بولدى. وندا «اقتوبە» «اتىراۋدى» 2:0 ەسەبىمەن جەڭدى.
سول جىلدان بەرى سۋپەركۋبوك ويىندارى جىلما-جىل تۇراقتى تۇردە ۇيىمداستىرىلىپ كەلەدى. بۇگىنگى كۇنگە دەيىن وعان توعىز كوماندا شىقتى.
«اقتوبە» ءۇش مارتە اتالمىش ويىندا سىنعا ءتۇستى. ۇشەۋىندە دە جەڭىمپاز اتاندى. كەرىسىنشە «توبىل» ەكى مارتە بۇل كەزدەسۋگە شىققانىمەن، قارسىلاسىنا ەسە جىبەرىپ قويدى.
ايتا كەتەرلىگى، سوڭعى ءتورت جىلدان بەرى سۋپەركۋبوكتا «استانا» مەن «قايرات» كوماندالارى ءوزارا تارتىسقا ءتۇسىپ كەلەدى. ونىڭ ەكەۋىندە استانالىق كلۋب جەڭىسكە جەتسە، ەكەۋىندە الماتىلىق فۋتبولشىلار باسىم ءتۇستى.
بۇعان دەيىن سۋپەركۋبوك ويىندارى 1995، 2017-جىلدارى عانا الماتى قالاسىندا وتكىزىلدى. قالعان كەزدەسۋ ەلورداداعى «استانا-ارەنا» ستاديونىندا بولدى.
بۇدان بۇرىن فۋتبولدان قازاقستان ۇلتتىق قۇراماسىنىڭ باس باپكەرى تاعايىندالعانى حابارلاعان.