بەت-الپەتكە قاراپ گەنەتيكالىق اۋرۋدى انىقتايتىن قوسىمشا ازىرلەندى

استانا. قازاقپارات - جاساندى ينتەللەكت ادامنىڭ كوزقاراسىنا، بەت-الپەتىندەگى ەرەكشەلىكتەرىنە قاراپ، اۋرۋ بەلگىلەرى پايدا بولماي تۇرىپ ەرتە دياگنوستيكا جاساۋعا كومەكتەسەتىن بولادى.

BBC باسىلىمىنىڭ جازۋىنشا، عالىمدار جاڭا زەرتتەۋ بارىسىندا ادامنىڭ جۇزىندەگى وزگەرىستەر ناقتى ءبىر اۋرۋدىڭ بەلگىلەرى بولا الاتىنىن انىقتادى.

«FDNA اتتى بوستوندىق ستارتاپ كومپانيا Face2Gene قوسىمشاسىن جاساپ شىعارعان. بۇل قوسىمشا ەمدەلۋشىنىڭ بەت-الپەتىنە قاراپ گەنەتيكالىق اۋرۋلاردىڭ پايدا بولۋىن ەرتە انىقتاي الادى. قوسىمشا جاساندى ينتەللەكت تەحنولوگياسىنا نەگىزدەلگەن. ونىڭ الگوريتمى ادامنىڭ بەت پىشىنىنە قاراپ سيرەك كەزدەسەتىن گەنەتيكالىق اۋرۋلاردى دا ەرتە انىقتاي الادى»، - دەپ جازادى باسىلىم.

اۆتوردىڭ ايتۋىنشا، الگوريتمگە 216 گەنەتيكالىق اۋرۋمەن اۋىراتىن 17 مىڭ ادامنىڭ سۋرەتى كورسەتىلگەن. سول ارقىلى جاساندى ينتەللەكت ولاردىڭ كەلبەتىندەگى وزگەرىستەر مەن ەرەكشەلىكتەردى انىقتاعان.

«بۇل بەلگىلەردى دارىلەرگەر كورە المايدى. وسى كۇنگە دەيىن Face2Gene جۇيەسى قويعان دياگنوزدىڭ %91 دۇرىس بولىپ شىققان. ال گەنەتيكالىق اۋرۋلار ەرتە انىقتالعان جاعدايدا وعان جاسالاتىن ەم-دوم شارالارى دا جىلدام اسەر ەتەتىنى بەلگىلى. سيرەك كەزدەسەتىن اۋرۋلار الەم حالىقتارىنىڭ ون پايىزىندا بولاتىندىقتان، مۇنداي تەحنولوگيالار مەديتسيناعا توڭكەرىس اكەلەتىن بولادى»، - دەيدى اۆتور.